«Որոշ հոգևորականներ Կաթողիկոսին առաջարկել են կարգալույծ անել Տավուշի թեմի առաջնորդին»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գառումը․ «Անմեղության կանխավարկածը ԲՈԼՈՐԻ համար է, այդ պատճառով՝ երեկ լուռ եմ մնացել: Այսօր էլ շատ ասելիք չկա այս սարսափելի տեղեկատվական տեռորի հոսքերում:
Բայց, կարևոր է, մի քանի արձանագրումներ, որոնց մասին գրել եմ նաև նախկինում:
ա/ Եկեղեցին, Մայր Աթոռը, նրա թեմակալ առաջնորդներն իրավունք չունեն զբաղվել քաղաքականությամբ, ճիշտ այնպես, ինչպես Հայաստանի վարչապետն իրավունք չունի մտնել ներեկեղեցական գործերի մեջ:
բ/ Երբ Տավուշի թեմի նախկին առաջնորդը մտավ ներքաղաքական ասպարեզ, այդ պահից Հայոց եկեղեցին դրվեց հարվածի տակ, սա պետք էր գիտակցել:
գ/ Երբ Տավուշի թեմի առաջնորդը դուրս եկավ փողոց, Մայր Աթոռը պետք է հստակ հայտարարեր, որ համաձայն չէ այդ որոշման հետ: Ի դեպ, իմ տեղեկություններով, Մայր Աթոռում որոշ հոգևորականներ Ամենայն Հայոց կաթողիկոսին առաջարկել են կարգալույծ անել թեմի առաջնորդին:
դ/ Մեր թեմակալ առաջնորդները, այո, ՀՀ քաղաքացիներ են, այո, մտահոգ են երկրի ճակատագրով, բայց անթույլատրելի է և դատապարտելի հեղաշրջման կոչեր անելը և այն անպարկեշտ բառապաշարը, որ օգտագործում էին վարչապետի և նրա թիմի հասցեին: Ճիշտ նույն անպարկեշտ բառապաշարն օգտագործում է վարչապետը և թիմը Ամենայն Հայոցի հասցեին, որ նույնպես դատապարտելի է:
ե/Ցավալիորեն, ընդդիմությունը հերթական առիթը տվեց, որպեսզի իշխանությունները գործեն այնպես, ինչպես իրենց սիրտն է ուզում:
զ/ Ամենայն Հայոց կաթողիկոսն ավելի խոցելի է և ավելի խոցելի է դառնում Տավուշի թեմի առաջնորդին հրապարակային աջակցությունից հետո:
Եվ, վերջապես, իշխանության և ընդդիմության փոխադարձ ատելությունը այն աստիճանի է, երեկվա տեղեկատվական տեռորը վկա, որ նրանք պատրաստ կլինեն երկիրը վարի տալ՝ միայն թե պահեն իշխանությունը կամ հասնեն իշխանության»: