«Պատգամավորները պետք է Նիկոլի «ձեռքը բռնեն», ասեն՝ չես կատարել կառավարության ծրագիրը, պետք է հեռանաս». Գառնիկ Իսագուլյան

«Փաշինյանը թողած իր «սուրբ գիրքը»՝ կառավարության ծրագիրը, իր կեղծ թեզերով ասում է բաներ, որոնք ապացուցելի չեն: Իսկ որ ինքը խախտել է կառավարության ծրագիրը, ապացուցելի է»,- «Եվրոմեդիա»-ի եթերում այս տեսակետը հայտնեց «Ազգային անվտանգություն» կուսակցության նախագահ Գառնիկ Իսագուլյանը:

Նրա խոսքով՝ ամբողջ ժողովրդի ուշադրությունը շեղելու համար Փաշինյանը մեջտեղ է բերել Եկեղեցու օրակարգը: «Մեր պատգամավորներն ունեն պարտավորություններ, լիազորություններ, նախաձեռնություններ ցուցաբերելու իրավունք, որը հասարակ քաղաքացին չունի»,- նշեց Իսագուլյանը և դիմելով ընդդիմադիր պատգամավորներին՝ նշեց. «Եթե դուք ԱԺ-ում ձեր ֆունկցիան կատարեք, այս մարդը չի կարող բերել այլ օրակարգ: Ամեն նիստի կառավարության ծրագիրը կարդացեք հոդված-հոդված ու ասեք՝ դու դա չես կատարել և պետք է հեռանաս: Եթե դուք դա չեք անում, ամբողջ հայերին դարձնելու է բանտարկյալներ: Եթե նա գալիս է ԱԺ, պետք է ասեն՝ ուրիշ բան մի՛ խոսիր, խոսի՛ր քո ծրագրից՝ ինչ ես կատարել: Նիկոլի «ձեռքը բռնեք», որովհետև, որպես պատգամավոր, այդ իրավունքը ունեք:

Ասեք՝ Նիկոլ, քո համար «սուրբ գիրքը» կառավարության ծրագիրն է, որը պարտավոր էիր կատարել: Դու դա չես կատարել, ճիշտ հակառակն ես արել, դրա համար էլ օրենքը նախատեսում է քո հրաժարականը: Եթե դու կամովին դա չես անում, ապա դա պարտավոր են իրագործել ԱԺ պատգամավորները»: