«Կոչ եմ անում Կոնգրեսի շարքային անդամի կարծիքը չվերագրել ՀԱԿ ղեկավարների կամ պաշտոնական դիրքորոշմանը»․ Լևոն Զուրաբյան

ՀԱԿ փոխնախագահ Լևոն Զուրաբյանի ֆեյսբուքյան գրառումը․ «ԱՆՀՐԱԺԵՇՏ ԲԱՑԱՏՐՈւԹՅՈւՆ
Հայ Ազգային Կոնգրեսին անդամակցում են հազարավոր մարդիկ: Նրանք անհատներ են, որոնք սեփական կարծիք ունեն: Մենք հարգում ենք անհատական ազատությունները, մասնավորապես, սեփական կարծիք ունենալու եւ հայտնելու իրավունքը: Մենք ազատական կուսակցություն ենք, հարգանքը մարդու ազատության նկատմամբ, անգամ եթե մենք այդ կարծիքը չենք կիսում, անգամ եթե վրդովվելու աստիճանի դեմ ենք այդ կարծիքին, մեր «գենետիկ կոդի» մեջ է:
Մեր մեջ կան տնտեսական ավելի լիբերալ քաղաքականության, եւ ավելի սոցիալիստական մոտեցման աջակիցներ: Կան արեւմտամետներ, կան ռուսամետներ, չնայած մեր պաշտոնական գիծը՝ աշխարհաքաղաքական հավասարակշռություն պահպանելն է: Կան նրանք, ովքեր դնում են իրենց պրոֆիլում ուկրաինական կամ ռուսական դրոշներ, ցույց տալով, թե ում են համակրում այդ պատերազմում: Ոմանք կարող են համակրել Իրանին, ոմանք՝ Իսրայելին: Մեր կուսակցականները նախեւառաջ անհատներ են, որոն կարող են անձնական կարծիքներ, անձնական վերաբերմունք, անգամ թշնամանք ունենալ եւ արտահայտել որեւէ այլ անձի նկատմամբ եւ անգամ կուսակցության ներսում:
Մենք ֆաշիստական կամ տոտալիտար վերահսկողություն կուսակցության ներսում չենք իրականացնում, առանձին, հատկապես, շարքային անդամների գրառումների համար որեւէ պատասխանատվություն չենք կրում եւ եւ նրանց հրապարակայնորեն արտահայտված կարծիքը անհրաժեշտաբար չենք կիսում, որոշ դեպքերում անգամ նախատում ենք, բայց ոչ մեկին չենք կարող արգելել կարծիք հայտնելը, եթե իհարկե, դա օրենքի (կամ հասարակական համակեցության տարրական նորմերի աղաղակող) ոտնահարում չէ:
Խիստ վերահսկողություն եւ կարգապահություն մենք իրականացնում ենք միայն ընտրարշավների կամ մեր կողմից կազմակերպված հանրային միջոցառումների ժամանակ, որովհետեւ դրանց համար մենք կրում ենք հավաքական պատասխանատվություն որպես քաղաքական կազմակերպություն:
Հետեւաբար, կոչ եմ անում երբեւէ Կոնգրեսի որեւէ շարքային անդամի կարծիքը չվերագրել Հայ Ազգային Կոնգրեսին, նրա ղեկավարներին, Կոնգրեսի պաշտոնական դիրքորոշմանը կամ գծին: Հուսով եմ, այս բացատրությունը կփարատի առանձին անձնական մեկնաբանությունների պատճառով Կոնգրեսից նեղված մարդկանց կասկածները եւ անհանգստությունները»։