«Եթե մարդը ունի անձնական կյանք, չի կարող լինել կաթողիկոս, ինքը կաթողիկոս չի»․ Նիկոլ Փաշինյան

Վարչապետ Նիկոլ Փաշինյանը ֆեսբուքյան էջում տեսանյութ է հրապարակել՝ կից գրառմամբ․ «Կրթվելը նորաձև է» շարժման շրջանակում պատասխանեցինք «Ազատություն» ռադիոկայանի լրագրողի հարցին, ով միջոցառմանը գրանցվել էր որպես քաղաքացի։

«Մեր հոգևորականների պրոբլեմն Աստծո հետ է, ոչ թե ինձ հետ․․․ Իրենք կուսակրոն քահանաներ են, Մայր Աթոռի՝ Հիսուս Քրիստոսի իջման վայրում ծնկի են գալիս և ուխտագիր են ստորագրում, որ իրենք չեն ունենալու անձնական կյանք։ Աբսուրդ է «կաթողիկոսի անձնական կյանք» բառակապակցությունը։ Եթե մարդը ունի անձնական կյանք, չի կարող լինել կաթողիկոս, ինքը կաթողիկոս չի»,- տեսանյութում ընդգծում է Փաշինյանը՝ պատասխանելով Հայ առաքելական եկեղեցու և հոգևորականների շուրջ տեղի ունեցող գործընթացների վերաբերյալ հարցին։

Անդրադառնալով դիտարկմանը, որ հոգևորականների անձնական կյանքին վերաբերող գրառումներից ելնելով՝ հնչում են կասկածներ, որ, որպես վարչապետ, օգտագործելով իր լծակները, ձեռք է բերում հոգևորականների անձնական կյանքի մասին տվյալներ և դրանք հրապարակայնացնում, Փաշինյանը նշում․ «ԱԱԾ-ն վարչապետին ենթակա մարմին է և ամեն օր ինձ զեկուցում է հանրապետությունում տիրող օպերատիվ իրավիճակի մասին, և եթե անվտանգության հետ կապված և հարակից խնդիրներ կան, բնականաբար ես չեմ կարող չիմանալ, և իմ իմանալը բացարձակապես օրինական է»։