«Պատասխանատվությունը կրելու ենք բոլորս»․ Արամ Վարդևանյան

«Քրեական գործ՝ կոչի վերաբերյալ՝ կոչի բացակայության պայմաններում, ինչն իրավական աբսուրդ է»,- փաստաբան Արամ Վարդևանյանն այսպես որակեց Սամվել Կարապետյանի գործը։ Նրա խոսքով բոլոր հիմքերն առկա են՝ պնդելու, որ Կարապետյանին կալանավորել են, որպեսզի ՀԷՑ-ի նկատմամբ միջամտությունը կատարեն։
Նշենք, որ ԱԺ-ն այսօր առաջին ընթերցմամբ ընդունեց ՀԷՑ-ը պետականացնելու նպատակով օրակարգ բերված օրենսդրական նախագիծը։
Դիտարկմանը, թե Փաշինյանը հանրայնացրել է նամակ, ըստ որի նա դեռ մայիսին է ցուցում տվել զբաղվել ՀԷՑ-ով, և դա է մտահոգել Սամվել Կարապետյանին, Վարդևանյանն արձագանքեց․ «Այսինքն ՀԷՑ-ի վերաբերյալ գործողությունների խոստում է տվել, որն ընդհանրապես օրենքի և սահմանադրականության հետ կապ չունի։ Երբ առկա են միջազգային իրավական արբիտրաժային պաշտպանության մեխանիզմները, Սամվել Կարապետյանի մոտ ի՞նչ մտահոգություն պետք է առաջացած լինի»,- ասաց Վարդևանյանը՝ հույս հատնելով, որ քաղաքական պատասխանատուները պատկերացնում են ՀԷՑ-ի վերաբերյալ գործողությունների հետևանքները․ «Եթե ի վերջո այդ իրավունքի միջամտությունը տեղի ունենա, պատասխանատվությունը կրելու ենք բոլորս, քանի որ ՀՀ-ն է պատասխանատվության ենթարկվելու»,- ասաց Վարդևանյանը։