«Պետության ղեկավարն ու իշխող ուժը ամբարտավանորեն համոզված են, որ անսխալական են»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Փաշինյանի և ընկերների ամենավտանգավոր կողմը
Փաշինյանի և իշխող թիմի մասին հազար ու մի քննադատություն է հնչել, բայց չի նշվել կամ գրեթե չի նշվել, իմ կարծիքով, ամենավտանգավոր կողմը:
Երբ Փաշինյանը (կամ որևէ ՔՊ կուսակցության անդամ) ասում է կամ անում է մի բան, ինքը 100 տոկոսով համոզված է, որ ճիշտ է ասում և ճիշտ է անում:
Օրինակ, երբ 2018-ին թեմի առաջնորդներից մեկը պատվիրակություն էր ուղարկում հեղափոխության առաջնորդ, վարչապետ Փաշինյանի մոտ և խորհուրդ տալիս, որ Նոր Հայաստանում պետք է լինի Նոր Հայրապետ, այսինքն՝ Գարեգին Բ-ին պետք է հեռացնել, Փաշինյանը 100 տոկոսով համոզված էր, որ դա անելու բան չէ և պետությունն իրավունք չունի մտնել եկեղեցու տարածք:
Քիչ առաջ ՀՀ վարչապետը ֆեյսբուքում հերթական գրառումն է արել և կրկնել, որ «Կտրիճ Ներսիսյանը պետք է լքի» Մայր Աթոռը: Ու նա 100 տոկոսով համոզված է, որ ճիշտ է անում, որ նոր կաթողիկոս է ուզում բերել:
Եթե իրավիճակ փոխվի, կասկած չունեմ, որ Փաշինյանը կրկին պատմական սելֆի կանի Ամենայն Հայոց կաթողիկոս Գարեգին Բ-ի հետ կամ առաջինը կհամբուրի Վեհի պարզած խաչը:
Կամ երբ Ստեփանակերտում պարոն Փաշինյանն ասում էր, որ «Արցախը Հայաստան է և վերջ», նա համոզված էր, որ ճիշտ բան է անում:
Երբ վերջերս նա հայտարարեց, որ «մենք ոչ թե կորցրել ենք Լեռնային Ղարաբաղը, այլ ձեռք բերել Հայաստանի անկախությունը», նույն կերպ նա համոզված է, որ հանճարեղ բան է ասել:
Իրավիճակը փոխվի, կասկած չունեմ, որ Սևր կթափահարի կամ կդառնա Հայաստանի հետ Արցախի միավորման մոլեռանդ ջատագով:
Ահա սա է ամենավտանգավորը, որ պետության ղեկավարն ու իշխող ուժը ամբարտավանորեն համոզված են, որ անսխալական են»։