«Էականն այն է, թե ԱՄՆ-ն ճանապարհների ապաշրջափակման վերաբերյալ առաջարկ արե՞լ է»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «ԱՄՆ պետքարտուղար Մարկո Ռուբիոն հայտարարել է, որ հուսով է Հայաստանի և Ադրբեջանի միջև մոտ ապագայում կկնքվի խաղաղության համաձայնագիր:

Ռուբիոն դարձյալ չի անդրադարձել օրերս տարածված տեղեկությունը, թե արդյո՞ք ԱՄՆ-ն Հայաստանին ու Ադրբեջանին անում է ճանապարհների ապաշրջափակման վերաբերյալ որևէ առաջարկ:

Սա է էականը, որովհետև Հայաստանի և Ադրբեջանի միջև խաղաղության համաձայնագիրը բացարձակապես չի լուծելու խաղաղության հարցը, քանի դեռ լուծում չունեն մյուս առանցքային հարցերը՝ թե ճանապարհների հետ կապված, թե կապված նաև սահմանազատման ու սահմանագծման գործընթացի հետ:

Ի վերջո, «մոռացության» է մատնված նաև հարցը, թե ինչո՞ւ չի մեկնարկում սահմանազատման ու սահմանագծման գործընթացը, որի աշխատանքային կանոնադրությունը պատրաստ է վաղուց և կողմերը հաստատել են վաղուց: Ամիսներ առաջ հայտարարվեց, որ պայմանավորվել են ուղղությունը՝ Հյուսիսային կետից մինչև հարավային կետ: Ուրեմն ինչո՞ւ չի մեկնարկում գործընթացը:

Ակնհայտ է, որ հայ-ադրբեջանական գործընթացը խաղաղությանը մոտ է միայն ու միայն խոսքերով, իսկ ըստ էության այն բացարձակապես հեռու է խաղաղության իրական նախադրյալներից:

Այդ իմաստով, ի դեպ, կարիք չկա նաև խաբել հայ հանրությանը, ներկայացնելով, թե իբր մոտ է խաղաղությունը և այն արտահայտվելու է պայմանագրով: Բոլորովին: Պայմանագրով արտահայտվել կարող է միայն ինքնախաբեությունը, պատրանքը, բայց ոչ խաղաղությունը: Խաղաղությունը ուժերի հարաբերակցության վրա հիմնված բովանդակություն է: Երբ կա այդ բովանդակությունը՝ միկրո կամ մակրո մակարդակում, ապա նույիսկ կարող է չլինել որեւէ պայմանագրի կարիք: Երբ այդ բովանդակությունը չկա, կարող են լինել տասնյակ պայմանագրեր, որոնք պարզապես ի չիք կդառնան մի քանի ժամվա ընթացքում»: