«Դավիթ Ղազինյանը ձև չունի մնալու»․ Ռոմանոս Պետրոսյան

«Իմ լիազորությունները սահմանված են ոլորտը կարգավորող մի շարք օրենքներով»,- լրագրողների հետ զրույցում ասաց ՀԷՑ-ում որպես ժամանակավոր կառավարիչ նշանակված Ռոմանոս Պետրոսյանը։ Նա մանրամասնեց, թե ինչու է աշխատանքային առաջին օրն ուշացել, նրա խոսքով իր լիազորությունները Պետական ռեգիստրում գրանցելու թղթարարությամբ է եղել զբաղված։
Անդրադառնալով կադրային քաղաքականությանը, մասնավորապես ՀԷՑ-ի տնօրենի ժամանակավոր պաշտոնակատար Դավիթ Ղազինյանի մնալ-չմնալուն՝ Ռոմանոս Պետրոսյանը հայտնեց․ «Դավիթ Ղազինյանը ձև չունի մնալու, քանի որ ՀԷՑ-ն այս վիճակի հասցնողներից մեկը հենց նույն պաշտոնյան է։ Այս պահին նա ի պաշտոնե իմ ենթական է, նրա լիազորությունները դադարել են ուրբաթ օրը, ժամը 18։00–ից, և իր ասուլիսը նա տվել է, որպես գլխավոր տնօրենի տեղակալ, այդ պահին նա ժամանակավոր պաշտոնակատար չէր»։ Ռոմանոս Պետրոսյանի խոսքով մասսայական ազատումներ չեն սպասվում։ «Կազատվեն նրանք, որոնց ղեկավարման ընթացքում ՀԷՑ-ը հասցրել են այս վիճակին, որ պետությունը ստիպված է կանխարգելիչ միջոցառումներ իրականացնել»,- ասաց Պետրոսյանը։