«Մարդիկ վարկ են վերցնում՝ մտածելով, որ տոկոսը 12 է, իրականում մարում են 22%-ով». Մհեր Կարագոզյան

«Հանրային վերահսկողություն» ՀԿ նախագահ Մհեր Կարագոզյանի ֆեյսբուքյան գրառումը․ «Ի՞նչ է կատարվում մեր բանկային համակարգում
Հայաստանում գրանցված բանկերն ու վարկային կազմակերպությունները տարիներ շարունակ գործում են առանց բավարար հանրային վերահսկողության։ Թեև դրանք կոչված են սպասարկելու մեր ֆինանսական անվտանգությունը, շատ դեպքերում քաղաքացիները հենց այս համակարգից են տուժում։
Ահա մի քանի խնդիր, որոնց արդեն իսկ բախվել են հազարավոր քաղաքացիներ՝
* Վարկային պայմանագրեր, որոնք ոչ ոք չի հասկանում։ Բարդ, իրավաբանական ձևակերպումներ, թաքնված տույժեր ու վճարներ։ Մարդիկ վարկ են վերցնում՝ մտածելով, որ տոկոսը 12% է, բայց իրականում մարում են 22%-ով։
* Խարդախ փոխանցումներ ու անհետացած գումարներ, որոնց վրա բանկերն արձագանքում են՝ «դուք եք մեղավոր», իսկ Կենտրոնական բանկը լռում է։ Քաղաքացիները մնում են առանց գումարի, առանց արդարության։
* Վարկային ճնշում ու կախվածություն։ Մարդիկ մի վարկով փակում են մյուսը, հայտնվում բանկային լարերի մեջ, իսկ բանկերը «սպասարկում» են դա՝ նոր ու ավելի բարդ պայմաններով։
* Արտահայտված անտարբերություն սոցիալական խնդիրների հանդեպ։ Ո՛չ հաշվի է առնվում մարդու գործազուրկ լինելը, ո՛չ հիվանդությունը, ո՛չ էլ նրա դժվար կացությունը։
* Կենտրոնական բանկի պասիվություն։ Լուրջ հարցերի դեպքում՝ բողոքը կրկին վերադարձվում է հենց այն բանկին, որի դեմ ես բողոքել։ Այսինքն՝ ոչ մի վերահսկողություն։
* «Մրցակցություն» միայն տեսականորեն։ Բոլոր բանկերում գրեթե նույն՝ բարձր տոկոսները, նույն տույժերը, նույն քաղաքականությունը։ Սա համակարգային մենաշնորհ է, ոչ թե առողջ շուկա։
Սա արդեն միայն ֆինանսական չէ, այլ սոցիալական և իրավական խնդիր է։
Մարդիկ իրենց երկրում պետք է ունենան անվտանգ ու արդար ֆինանսական միջավայր։ Բանկային համակարգը պետք է ծառայի մարդկանց, ոչ թե հակառակը։
Ժամանակն է, որ մենք՝ քաղաքացիներս, բարձրաձայնենք, ներկայացնենք փաստեր, պայքարենք օրենսդրական, համակարգային փոփոխությունների համար։
Մենք պահանջում ենք՝
▪️ Արդար վարկային պայմաններ
▪️ Կիբեռհանցագործությունների իրական բացահայտում
▪️ Անկախ վերահսկողություն բանկերի նկատմամբ
▪️ Պաշտպանություն խոցելի խմբերի համար
Եթե դուք էլ բախվել եք բանկային անարդարությանը կամ կիսում եք այս մտահոգությունը՝ միացեք։
Հանրային լռությունը միշտ բանկային շահերին է օգուտ տալիս։ Ժամանակն է փոխել այդ հին կանոնը»: