«Այս կառավարչական հանցագործությունը հարված է ոչ միայն ՀՀ սահմաններին, այլև պետության հիմնասյուներին»․ Արման Բաբաջանյան

ԱԺ նախկին պատգամավոր Արման Բաբաջանյանի գրառումը. «Արաքս գետի սահմանային գոտում կատարված հանցագործության պատմությունը մերկացնում է այն տասնամյա կառավարման փտած համակարգը, որի ներկայացուցիչները ոչ միայն կեղեքել են պետական ռեսուրսները, այլև ուղղակիորեն վնասել են մեր երկրի տարածքային ամբողջականությանը։
Խոսքը «Մուկ» մականունով Հովիկ Աբրահամյանի մասին է, ով սկզբում Քոչարյանի ամենամերձավոր շրջապատից էր, ապա դարձավ Հանրապետական կուսակցության կենտրոնական դեմք, Ազգային ժողովի նախագահ, այնուհետև՝ վարչապետ։ 2006-2016 թվականների ընթացքում հենց իր պաշտոնավարման օրոք՝ մինչև վերջին օրը, Արաքս գետի արգելված գոտում իրականացվել է ապօրինի ավազահանքային գործունեություն։ Այս հանցավոր շահարկման արդյունքում ոչ միայն վնաս է հասցվել էկոհամակարգին, այլև փոխվել է Հայաստանի պետական սահմանով անցնող Արաքս գետի հունը։ Փաստացի՝ շուրջ 5950 մ² հողատարածք դեգրադացվել է, իսկ գետի հունի փոփոխության հետևանքով առաջացել է 307 հեկտար մակերեսով նոր կղզյակ, որը գտնվել է արդեն Հայաստանի սահմանային վերահսկողությունից դուրս։
Սա ոչ թե Թուրքիայի կողմից գրավում է, այլ կառավարչական հանցագործություն՝ ի վնաս Հայաստանի տարածքային ամբողջականության, կատարված ոչ թե թշնամու, այլ Հայաստանի ղեկավար պաշտոն զբաղեցրած անձի կողմից։ Հանցանք, որը հարված է ոչ միայն սահմաններին, այլև պետության հիմնասյուներին։
Հայաստանի դեմ այս մոնղոլ-թարական արշավանքին, սրանց կողմից պետության զավթմանը իրավական կամ քաղաքական գնահատական չտրվեց։ Հովիկ Աբրահամյանը ազատ շրջում է, IT ոլորտում ներդրումներ է անում, թալանված պետական միջոցներով ֆինանսավորում է քաղաքական ուժերի, որոնք պատրաստվում են նորից վերադառնալ իշխանության՝ կրկին բռնազավթելու այն պետությունը, որի հիմքերը տարիներ շարունակ քայքայվել են հենց իրենց ձեռքով։
Պետության հանդեպ գործած այս հանցագործությունները չպետք է մոռացության մատնվեն, ոչ մի միլիարդային ներդրում, բարեգործություն կամ քաղաքական խոստում չպետք է լվան այն հանցանքը, որը վեր է ոչ միայն օրինականությունից, այլև ազգային արժանապատվությունից։ Սա պետք է լինի անողոք, անբեկանելի հաշվեհարդար պետության և դավաճանած իշխանավորների միջև։ Ոչ մի անուն, ոչ մի միլիարդ, ոչ մի անցյալ պաշտոն չի փրկելու նրանց պատասխանատվությունից»: