«Վարչապետը սխալ է լսել Սամվել Կարապետյանի բառերը»․ Ռոբերտ Ամստերդամ

«Սա քաղաքական գործ է, մենք տեսնելու ենք շոու-դատավարություն»,- մամուլի ասուլիս ժամանակ ասաց իրավաբան և մարդու իրավունքների միջազգային պաշտպան Ռոբերտ Ամստերդամն՝ անդրադառնալով գործարար Սամվել Կարապետյանի դեմ հարուցված քրեական գործին։ Նշենք, որ Ամստերդամը պատրաստվում է միանալ Կարապետյանի պաշտպանական խմբին։
Իրավաբանի խոսքով քաղաքական գործի առանձնահատկությունն այն է, երբ գործադիր ճյուղը ակնհայտորեն ներգրավված է լինում․ «Վարչապետն, ըստ երևույթի, սխալ է լսել վստահորդիս բառերը, դրանից հետո նա ասել է սպառնացող, վիրավորական բառեր, որոնցից բխում է, որ նա ողջ իշխանությունը գործադրելու է պարոն Կարապետյանի նկատմամբ։ Ազատ ժողովրդավարական հասարակությունում դա չլսված բան է»,- ասաց իրավաբանը և որպես քաղաքական հետապնդման այլ ապացույցներ՝ մեջբերեց գլխավոր դատախազի մասնակցությունն ու ձերբակալման հանրային բնույթը։ «Դա անընդունելի է, աղաղակող և ոչ բարոյական»,- ընդգծեց իրավաբանը՝ շեշտադրելով, որ Կարապետյանը Հայաստանում էր հոր մահվան կապակցությամբ։
Իրավաբանի խոսքով միջազգային հանրությանն ու կազմակերպությունների ուշադրությանը կներկայացվի գործի քաղաքական բնույթը, որը եկեղեցու պաշտպանության համատեքստում է։ Հայտնի իրավաբանը դատապարտեց եկեղեցու և Վեհափառի դեմ սկսված արշավն ու եկեղեցու ներքին կյանքին միջամտելու փորձը։