«Եթե Ադրբեջանը Սև լճի տարածքները չտա, ի՞նչ եք անելու»․ հարց՝ Դավիթ Խուդաթյանին

«Երբ դեռ ՀՀ-ի և Ադրբեջանի միջև սահմանազատումը չի իրականացվել և սահմանը չի որոշվել, բայց եթե Ադրբեջանն ինչ-որ պահի ասեց՝ Սև լճի հարակից տարածքները ձեզ չեմ տալիս, որովհետև դրանք իմն են, ի՞նչ եք անելու»,- ճեպազրույցի ժամանակ հարց ուղղվեց ՏԿԵ նախարար Դավիթ Խուդաթյանին։

Խուդաթյանը պատասխանեց․ «Հարցը հասցեագրվում է նաև սահմանազատման պրոցեսին։ Մենք վստահ ենք, որ սահմանազատման պրոցեսի արդյունքում այդ խնդիրները ամբողջությամբ կլուծվեն։ Հստակ ձևակերպվել է սահմանազատման այն պրոցեսը և տրամաբանությունը, որն արդեն իրականացվել է Կիրանցում։

Նախորդիվ իրականացված սահմանազատման պրոցեսը մեզ վստահություն է տալիս, որ նախ՝ այդ պրոցեսը շարունակական է լինելու, և երկրորդ՝ այդ պրոցեսով լուծում են ստանալու ձեր թվարկած խնդիրները։

Կա պայմանավորվածություն, որ սահմանազատման պրոցեսը շարունակվելու է, և ես հավատում եմ, որ խնդիրները, որոնք հասցեագրվելու են սահմանազատման գործընթացին, իրենց լուծումն են ստանալու խաղաղ ճանապարհով՝ սահմանազատման գործիքի կիրառմամբ»։