«Ի սկզբանե կալանքը որպես խափանման միջոց ընտրելը խայտառակություն էր, և հիմա փորձ է արվում դա շարունակել»․ Արամ Վարդևանյան

«Սամվել Կարապետյանի կալանքի միջնորդության նիստը սկսվել է, դեռևս քննիչն է ներկայացրել միջնորդությունը»,- այս մասին լրագրողների հետ զրույցում հայտնեց Սամվել Կարապետյանի պաշտպաններից Արամ Վարդևանյանը։

Նշենք, որ Սամվել Կարապետյանի ապօրինի կալանքը երկարաձգելու՝ դատախազության ներկայացրած միջնորդության քննությունն ընթանում է՝ արդեն մոտ 3 ժամ։

«Ակնհայտ անհիմն միջնորդություն է ներկայացվել, նվազագույն հիմնավորվածության շեմը բնավ չհաղթահարած։ Այս միջնորդությունը վերնագրված է Սամվել Կարապետյանին վերաբերող, սակայն Սամվել Կարապետյանի առնչություն ընդհանրապես չկա։ Ցանկացածի անունը կարող էր լինել»,- նշեց պաշտպանը՝ հայտնելով, որ դատական նիստը կարճ ժամանակով ընդհատվել է, քիչ անց կշարունակվի։

«Ներկայացվել է միջնորդություն, վարույթն իրականացնող մարմինը գտնում է, որ Սամվել Կարապետյանի նկատմամբ կալանքը որպես խափանման միջոց պետք է դեռևս գործի, այն պարագայում, երբ ի սկզբանե, երբ այս խափանման միջոցն ընտրվել էր, իրավական առումով դա խայտառակություն էր։ Եվ հիմա փորձ է արվում այդ խայտառակության շարունակությունն իրացնել դատարանում»,- նշեց փաստաբանը՝ հույս հայտնելով, որ ի վերջո արդարությունը և իրավունքը կգերակայեն։