«Հանրային իմունիտետը բարձրացնելու հարցն օրհասական է դառնում»․ Արմինե Օհանյան

«Հրապարակ» օրաթերթի գլխավոր խմբագիր Արմինե Օհանյանի ֆեյսբուքյան գրառումը. «Մեր հասարակության «իմունիտետը»՝ դիմադրողականությունն անասելի ընկել է: Պատճառներն՝ ակնհայտ են. պատերազմ, պատերազմի վախ, պարտություն ու պարտվողականության քարոզ, հազարավոր զոհեր, տարածքային կորուստներ, հոգեբանական ու աշխարհաքաղաքական խնդիրներ... բոլորը գումարվել են իրար: Ցածր իմունիտետն է պատճառը, որ ամենափոքր առիթով մարդիկ բռնկվում են, հուսահատվում, հրաժարվում պայքարից, պարփակվում իրենց կաղապարի մեջ, հաշտվում ստեղծված իրավիճակի հետ:
Ինչպե՞ս անել, որ մեր իմունիտետը բարձրանա, հանրային դիմադրողականությունը մեծանա: Որ մարդիկ սկսեն թացը չորից, կեղծիքը՝ ճշմարտությունից, իրական վտանգները՝ հորինվածից զատել: Որ Ալիևի ու Փաշինյանի ամեն ելույթից հետո չընկնեն դեպրեսիայի մեջ, դրսից հնչող ամեն ձևական շնորհավորանքից հետո չմտածեն՝ բաղձալի «խաղաղությունը հաստատվեց», ամեն իշխանական կեղծ քարոզչության լուրջ չվերաբերվեն, ամեն քրեական գործից հետո չմտածեն՝ «հաջորդը ինձ են բռնելու», ամեն կրակոցից չկարծեն, թե՝ պատերազմ է սկսվում...
Հանրային իմունիտետը բարձրացնելու հարցը գնալով օրհասական է դառնում, որովհետև ակնհայտ է, որ ոչ միայն մեր թշնամիները, այլև հենց մեր իշխանությունները շատ լավ ուսումնասիրել են մեր ժողովրդի թույլ տեղերը և գիտեն՝ ինչպես հոգեբանական գրոհներ կազմակերպել, ինչպես չեզոքացնել իրենց աթոռներին սպառնացող վտանգները: Հատկապես լավ կառավարում են պատերազմից ունեցած հանրային վախերը և դրանք օգտագործում են իշխանափոխության ցանկացած փորձ կանխելու համար: Հրաշալի գիտեն նաև՝ ինչպես վարկաբեկել իշխանության ձգտող ուժերին, վարչապետի պոտենցիալ թեկնածուներին: Հմտորեն շահարկում են Արցախի և արցախյան ծագումով նախագահների թեման: Եվ օգտագործում են հանրային գիտակցության մեջ մեխված կլիշեները՝ «նախկինները թալանել են», «բանակը չեն զինել», «եթե Նիկոլին հեռացնենք՝ պատերազմ կլինի» և այլն: Իսկ երբ նեղն են ընկնում՝ ևրոպաներից ու Ռուսաստանից մի քանի աջակցող խոսք, մի քանի հյուր է հայտնվում՝ տպավորություն ստեղծելով, թե գործող իշխանությանը ողջ աշխարհն աջակցում է: Հետն էլ կրթարշավ, պոդքաստ, հեծանվարշավ...իբրև թե կպած աշխատում ենք: Երբ մտածում են, որ կարող է իրենց «թույլ իշխանություն» անվանեն՝ քֆուրով ստատուսներ են գրում, մի քանիսին բանտ նստեցնում, մի երկուսին գործից ազատում:
Վստահ եմ՝ զինանոցում նման քայլերի դեռ մի մեծ տրցակ կա, որոնք առաջիկայում են կիրառելու: Ինչքան ընտրությունները մոտենան, այնքան արտառոց ու կատաղի քայլերի են դիմելու, որ շոկի մեջ գցեն, հուսահատեցնեն, ապատիա ներշնչեն հանրությանն ու վերարտադրվեն:
Իսկ մե՞նք ինչ ենք անում...»։