«Թվում է՝ նախաստորագրված փաստաթղթով նվազել է էսկալացիայի վտանգը»․ Գևորգ Փարսյան

«Որևէ քննարկում ինձ հետ չի եղել և տեղեկատվության փոխանցում էլ չի եղել նախքան վաշինգթոնյան փաստաթղթերի ստորագրումը, այդ ամենի մասին ես իմացել եմ մամուլից»,- այս մասին այսօր լրագրողների հետ զրույցում ասաց Կապանի քաղաքապետ Գևորգ Փարսյանը՝ անդրադառնալով հարցին՝ Թրամփի ուղու մասին Սյունիքում պատկերացում ունե՞ն, թե ոչ, արդյո՞ք քննարկումներ եղել են այդ մասին։

««Թրամփի ուղու» հետ կապված կդժվարանամ ինչ-որ բան ասել, կարծում եմ՝ ավելի կարևոր մասը դետալներն են, որոնք պետք է իրականացվեն․․․ Մենք դրական կողմերի վերաբերյալ լսում ենք իշխանություններից, պետք է սպասենք, տեսնենք՝ գործնականում այդ ամենն իրականանում է, թե ոչ։ Հույս ունենք, որ ստորագրված փաստաթղթերը կյանքի կկոչվեն այնպես, ինչպես ներկայացվում են, եթե այդպես լինի, պետք է որ դրական լինի»,- նշեց քաղաքապետը՝ ընդգծելով՝ դրականն այն է, որ թվում է, թե նախաստորագրված փաստաթղթով կարող է նվազել էսկալացիայի վտանգը, կապրենք, կտեսնենք։