««Արևմտյան Ադրբեջան» ասելով՝ Ադրբեջանը հավակնություններ ունի ՀՀ ամբողջ տարածքի նկատմամբ»․ Տաթևիկ Հայրապետյան

«Ադրբեջանում նկատվում է իրենց հռետորաբանությունը թաքցնելուն միտված քաղաքականություն, որովհետև նյութերի մեծ մասը, որոնք կապված են զավթողական կոնցեպտների, հայատյացության և սպառնալիքների հետ, հրապարակվում են բացառապես ադրբեջանալեզու աղբյուրներում»,- «168Ժամ»-ի հետ զրույցում նշեց ադրբեջանագետ Տաթևիկ Հայրապետյանը:

Նրա դիտարկմամբ՝ «Արևմտյան Ադրբեջան» ասելով Ադրբեջանը նկատի ունի, որ այն ներառում է ոչ թե ՀՀ տարածքի մեծ մասը, այլ ամբողջ տարածքը․ «Նույնիսկ ավելի շատ, քան Նիկոլ Փաշինյանի «Իրական Հայաստանը». եթե այն 29.743 է, իրենք 29.800 քառակուսի կիլոմետր տարածքի հանդեպ հավակնություն ունեն»:

«Եվ սա զուտ քարոզչություն չէ, այլ խորքային քաղաքականության մի մաս է, որը մտել է նաև կրթական ոլորտ: Եթե ադրբեջանցի երեխայի 5-րդ դասարանի դասագրքում է գրված, որ Խորհրդային Հայաստանը ձևավորվել է «Արևմտյան Ադրբեջանի» կամ ադրբեջանական հողերի վրա, և այս տարածաշրջանում Հայաստան չի եղել, ապա դա բացարձակ ոչ մի աղերս չունի խաղաղության և բարիդրացիության հետ»: