«Գերմանիայում անդրադարձել են ԼՂ հայ բնակչության հետ տեղի ունեցած բռնություններին». ԼՂ փախստականների իրավապաշտպան միություն

«ԼՂ փախստականների իրավապաշտպան միություն»-ը հայտնում է. «2025 թվականի օգոստոսի 21-ին Գերմանիայի «Սպառնալիքի տակ գտնվող ժողովուրդների ընկերության» գործադիր տնօրեն Սառա Ռեյնկեն, «Ցեղասպանության դեմ ճանաչման» ոչ առևտրային աշխատանքային խմբի նախագահ Դոկտոր Թեսսա Հոֆմանը, «Գերմանահայոց կենտրոնական խորհրդի» նախագահ Ջոնաթան Շպանգենբերգը, «Մարդու իրավունքների միջազգային ընկերության» (IGFM) հասարակայնության հետ կապերի ղեկավար Վալերիո Կյուգերը, «Քրիստոնեական համերաշխության միջազգային կազմակերպության» նախագահ Դոկտոր Ջոն Այբները և «Ստեփանոսի անվան հալածված քրիստոնյաների հիմնադրամը» դիմել են Գերմանիայի արտաքին գործերի նախարար դոկտոր Յոհան Վադեֆուլին ՝ Հայաստանի և Ադրբեջանի միջև խաղաղության գործընթացի վերաբերյալ մտահոգություններ հայտնելով։
Կոչի համահեղինակները նշում են, որ իրական խաղաղություն ձեռք բերել հնարավոր չէ առանց Լեռնային Ղարաբաղից բռնի տեղահանված հայերի իրավունքների պաշտպանման և անվտանգության ապահովման։ Նրանք դիմում են Գերմանիայի Կառավարությանը, որպեսզի վերջինս, համագործակցելով Եվրամիության և դրա անդամ պետությունների հետ, ակտիվ և սկզբունքային դեր խաղա խաղաղության հաստատման գործընթացում՝ ստանձնելով պատասխանատվություն։
Նրանք կոչ են անում Գերմանիայի Արտաքին գործերի նախարարին դիվանագիտական վճռականությամբ ստանձնել հայ ռազմագերիների և պատանդների վերադարձի վերաբերյալ տարվող աշխատանքների նկատմամբ պատասխանատվություն՝ օգտվելով տրված յուրաքանչյուր հնարավորությունից, մասնավորապես՝ քայլեր ձեռնարկել բանտարկյալների նկատմամբ համակարգված բռնության, այդ թվում՝ ծեծի, կեղծ մահապատիժների և հոգեբանական բռնության կանխման վերաբերյալ։ Կոչի հեղինակները պնդում են, որ Ադրբեջանի կողմից Լեռնային Ղարաբաղի կրոնական, մշակութային և պատմական ժառանգության ոչնչացումը անհապաղ պետք է դադարեցվի։
Գերմանիայի մարդու իրավունքների մասնագետները անդրադարձել են նաև Լեռնային Ղարաբաղի հայ բնակչության հետ տեղի ունեցած բռնություններին, այդ թվում տեղահանված անձանց համակարգված վտարումը, անվտանգ վերադարձի կանխումը, Լեռնային Ղարաբաղից հայ ժողովրդի նկատմամբ հոգեբանական բռնությունը, մարդկանց նպատակային գերեվարումը որպես ցեղասպանություն որակելու խնդրին։
Նրանք մատնանշել են միջազգային իրավունքի փորձագետների այն պնդումը, որ հայ ժողովրդի՝ երկրից հեռանալու որոշումը՝ պայմանավորված է եղել ադրբեջանական հարձակմամբ և ինը ամսվա զրկանքներով, որը ցույց է տալիս այն ծանր վնասը, որը Ադրբեջանի պաշտոնական քաղաքականությունն ու գործելակերպը հասցրել են Լեռնային Ղարաբաղի էթնիկ հայերին․ և այս գործողությունները համապատասխանում են ցեղասպանության սահմանմանը՝ համաձայն «Ցեղասպանության մասին կոնվենցիայի» 2(բ) հոդվածի:
Լեռնային Ղարաբաղի փախստականների իրավապաշտպան միությունը ողջունում է Գերմանիայի մարդու իրավունքների հարցերով զբաղվող մասնագետների այս քայլը՝ այն համարելով Լեռնային Ղարաբաղից բռնի տեղահանված արցախահայերի իրավունքների իրացմանը նպաստող կարևոր քայլ։ Այս համատեքստում կարևոր է ընդգծել նաև, որ պաշտոնյաների դիրքորոշումը հայ ռազմագերիների և պատանդների իրավունքների պաշտպանության և հայրենիք վերադարձի վերաբերյալ վճռական և հստակ է։
Մենք կոչ ենք անում միջազգային հանրությանն ու միջազգային կազմակերպություններին վճռական դիրքորոշում ցուցաբերել և հետևողական լինել արցախահայության նկատմամբ Ադրբեջանի վարած քաղաքականությանը՝ չզրկելով նրանց՝ իրենց իրավունքների լիարժեք իրացումից»: