«Ռազմագերիների հարցը խանգարում է խաղաղության կեղծ դարաշրջանի քարոզչությանը»․ Արմեն Աշոտյան

ՀՀԿ փոխնախագահ Արմեն Աշոտյանը ԵՄ գրասենյակի առջև միայնակ, ձեռքերը ճաղավանդակին շղթայված, մեկ ժամ լուռ ակցիա իրականացրեց՝ Բաքվում ապօրինի գերևարված հայ պատանդների ազատ արձակման պահանջով։
Ակցիայից հետո, պատասխանելով լրագրողների հարցերին, նա նշեց, որ նախապես չի հայտարարել ակցիայի մասին՝ վստահ լինելով, որ իրավապահները կխոչընդոտեն։ Խոսելով իշխանությունների դիրքորոշման մասին՝ Աշոտյանն ասաց․ «Նիկոլ Փաշինյանի համար ռազմագերիների հարցը գոյություն չունի, քանի որ այն խանգարում է իր հեքիաթին, խաղաղության կեղծ դարաշրջանի քարոզչությանը։ Երբ ամեն անգամ տեսնում ենք Բաքվի և Երևանի բանտերում իրենց քաղաքական կարծիքի համար բանտարկված մեր հայրենակիցներին, Նիկոլ Փաշինյանի հորինված խաղաղությունը փշրվում է հազարավոր բեկորների»,- ասաց Աշոտյանը՝ հավելելով, որ եթե անգամ ընդունենք, թե Նիկոլ Փաշինյանը 5 տարի փորձում է գերիներին վերադարձնել, բայց եթե դա չի ստացվում, նա ինքնակամ պետք է հեռանա։ «Իշխանափոխությունից հետո հնարավոր է կանխել ՀՀ-ի ջախջախումը, հնարավոր է հետ բերել մեր հայորդիներին, հնարավոր է պատասխանատվության կանչել Ադրբեջանի ռեժիմին, պատերազմ բերած դավաճաններին»,- ասաց Աշոտյանը։