«Մեթոդը, որ պետք է մարդուն ձեռք տաս, հոտոտես, ականջը, մազերը քաշես, տեսնես իսկական է, թե չէ, չպիտի լինի մեր սահմաններին»․ Նիկոլ Փաշինյան

«Հայ սահմանապահը ստուգելո՞ւ է ադրբեջանցիների անձնագրերը, հայ մաքսավորը ստուգելո՞ւ է ադրբեջանցիների բեռները, եթե ադրբեջանցիներն այդ ճանապարհի վրա հանցագործություն կատարեն, մեր պարեկները կարո՞ղ են միջամտել․․․»,- ԱԺ-Կառավարություն հարցուպատասխանի ժամանակ «Հայաստան» խմբակցության պատգամավոր Ագնեսա Խամոյանն այս հարցերն ուղղեց վարչապետ Նիկոլ Փաշինյանին՝ անդրադառնալով տրանսպորտային կոմունիկացիաների իրականացմանը՝ Թրամփի ուղիով։

Ի պատասխան՝ Փաշինյանը նշեց․ «Չի կարող լինել սահման առանց սահմանապահի․ դա նույնն է, եթե հարցնեք՝ տարածքային ամբողջականություն․ այդ տարածքը հողի՞ց է լինելու, ջրի՞ց, թե՞ ածխաթթու գազից, տարածքը տարածք է, սահմանը սահման է։ Եվ անընդհատ ինչու եմ ասում սահմանի անխախտելիություն․ սահմանը չնախատեսված ձևով անցնելը արդեն սահմանի խախտելիություն է։

Հաջորդը՝ այսօր բազմաթիվ երկրներում՝ Բրիտանիայում, ԱՄՆ-ում, ԱՄԷ-ում այդ երկրների սահմանապահները չեն ստուգում իրենց երկիր մտնող անձանց անձնագրերը, այդ անձանց անձնագրերը ստուգում է գործիքը՝ սարքավորումը։ Մենք այդ կարգավորումը պետք է մտցնենք և միայն այդ կետում չէ, ՀՀ-Վրաստան, ՀՀ- Թուրքիա, ՀՀ-Իրան սահմաններին, մեր օդանավակայանում նույնպես պետք է այդ կարգավորումը մտցնենք․ այդ մեթոդը, որ պետք է մարդուն ձեռք տաս, հոտոտես, ականջը քաշես, մազերը քաշես, տեսնես իսկական է, թե չէ, չպիտի լինի մեր սահմաններին»։