«Մարտի 1-ի համար պատասխանատվություն կրողները չպետք է մասնակցեն ՀՀ քաղաքական գործընթացներին». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «2025 թ. սեպտեմբերի 18-ին հրապարակված Մարդու իրավունքների եվրոպական դատարանի «Ֆարմանյանը և մյուսներն ընդդեմ Հայաստանի» վճիռը վերջնականապես ամրագրեց այն, ինչ հայ հասարակությունը տարիներ շարունակ բարձրաձայնում էր․ 2008 թ. մարտի 1-ի իրադարձությունների ժամանակ պետությունը խախտել է իր քաղաքացիների կյանքի իրավունքը և չի կատարել արդյունավետ քննության պարտավորությունը։
Այս վճիռը ոչ միայն իրավական փաստաթուղթ է, այլև քաղաքական մեղադրական ակտ Հայաստանի Հանրապետության այն ղեկավարների դեմ, որոնց իշխանության պայմաններում տեղի ունեցան սահմանադրական կարգի տապալում, պետության բռնի զավթում և քաղաքացիների նկատմամբ մահացու ուժի անհամաչափ կիրառում։ Դատարանի արձանագրած փաստերը աներկբա են․ սպանությունները պայմանավորված են եղել իշխանությունը պահպանելու և ընդդիմադիր շարժումը ճնշելու քաղաքական շահախնդրությամբ։
Այս իրողության պայմաններում Հայաստանի քաղաքական համակարգը պարտավոր է անցկացնել խորքային զտում։ Ժողովրդավարության պաշտպանությունը պահանջում է բացառել, որ Մարտի 1-ի հանցագործությունների պատասխանատվություն կրող անձինք և նրանց ղեկավարած քաղաքական ուժերը շարունակեն մասնակցել Հայաստանի քաղաքական գործընթացներին։ Հակառակ դեպքում մեր երկիրը դատապարտված է ապագայի ընտրություններին գնալու ոչ թե ժողովրդավարական մրցակցության, այլ հին բռնապետական ռեցիդիվների ստվերի ներքո։
Սահմանադրական կարգի տապալման և պետության բռնի զավթման համար պատասխանատու նախկին նախագահները՝ Ռոբերտ Քոչարյանը և Սերժ Սարգսյանը, ինչպես նաև նրանց քաղաքական ժառանգությունը կրող ուժերը, պետք է հեռացվեն քաղաքական դաշտից։ Դա ոչ թե վրեժխնդրություն է, այլ պետական անվտանգության և ժողովրդավարական ապագայի նվազագույն պահանջ։
Այս վճիռը Հայաստանի համար բացում է նոր էջ՝ արդարության և ժողովրդավարության վերականգնման։ Այն պարտադրում է ստեղծել անկախ ու թափանցիկ քննության մեխանիզմներ, ապահովել զոհերի հիշատակի արժանապատիվ պատասխանը և վերացնել քաղաքական հաշվեհարդարի մշակույթը։ Բայց ամենից առաջ՝ այն պարտադրում է քաղաքական դաշտը մաքրել նրանցից, ովքեր մեկ անգամ արդեն ապացուցել են, որ պատրաստ են իշխանությունը պահելու համար գնալ քաղաքացիական զոհերի։
Հայաստանի ապագան չի կարող կառուցվել բռնության ու անպատժելիության հիմքերի վրա։ Ժողովրդավարությունը պաշտպանելու համար պետք է բացառել հանցավոր անցյալի կրողները մեր պետության քաղաքականությունից։ Միայն այդպես հնարավոր կլինի վերադարձնել վստահությունը պետության և արդարության հանդեպ»: