«Բաքվում պահվող հայ գերիները միջազգային հանրության ամոթն են»․ Էդուարդ Շարմազանով

«Լեռնային Ղարաբաղում էթնիկ զտումների մասին լռելը նշանակում է աչք փակել մարդկության դեմ հանցագործությունների վրա»,- Մոսկվայում ընթացող Համաշխարհային հանրային ֆորումի ժամանակ ասել է ՀՀԿ ԳՄ անդամ Էդուարդ Շարմազանովը։
«2020 թվականի պատերազմից և 2023 թվականին հաջորդած լիակատար էթնիկ զտումից հետո հայ ժողովուրդը կորցրեց Լեռնային Ղարաբաղը։

2023 թվականի սեպտեմբերին ավելի քան 120,000 հայ բռնի կերպով վտարվեց իրենց նախնիների հողից՝ մեր ժողովրդի հետ պատմականորեն կապված տարածքի հայաթափմանն ուղղված քաղաքականության արդյունքում։
Մեր խորը ցավով, ԱՊՀ շրջանակներում մենք գործնականում չենք լսում այս ցավոտ թեմայի վերաբերյալ բաց և սկզբունքային քննարկում։
Էթնիկ զտումների հստակ նշաններ ունեցող գործողությունների մասին լռելը նշանակում է հանդուրժել անպատժելիությունը և աչք փակել մարդկության դեմ հանցագործությունների վրա։
Մի ամբողջ ազգ դարձել է զոհ՝ զրկվելով իր հայրենիքից՝ Ադրբեջանի հետևողական և արմատական ​​հակահայական քաղաքականության պատճառով»,- ասել է Շարմազանովը։
Նա անդրադարձել է նաև գերիների հարցին՝ ասելով․ «Բաքվում պահվող հայ գերիները ամբողջ միջազգային հանրության ամոթն են։ Այսօր տասնյակ հայ ռազմագերիներ և կալանավորված քաղաքացիական անձինք դեռևս պահվում են ադրբեջանական բանտերում։ Նրանց միակ հանցանքն այն է, որ հավատում էին ՄԱԿ-ի կանոնադրությանը, միջազգային իրավունքի արժեքներին և սկզբունքներին և պայքարում էին Լեռնային Ղարաբաղի ժողովրդի ինքնորոշման իրավունքի համար։

Միջազգային մարդասիրական իրավունքի այս կոպիտ խախտումը ամոթ է ոչ միայն անմիջական կատարողի, այլև ամբողջ միջազգային հանրության համար, որը ցուցաբերում է զարմանալի անտարբերություն»,- ասել է Շարմազանովը։