ՀԷՑ-ում նշանակումներն անում են Աննա Հակոբյանի մտերիմները. «Հրապարակ»

«Հրապարակ»-ը գրում է. «ՀԷՑ-ի ժամանակավոր կառավարիչ Ռոմանոս Պետրոսյանն ազատել է նաև ՀԷՑ-ի Սիսիանի կառույցի ղեկավար Ջիվան Մարգարյանին՝ նրա փոխարեն նշանակելով ոմն Ալիկ Մարտիրոսյանի, որի համար միջնորդել է զոհված Էդգար Մանուկյանի մայրը՝ Արսինե Սահակյանը, որը վարչապետի կնոջ՝ Աննա Հակոբյանի ընկերուհին է:
Տիկին Արսինեն բնիկ սիսիանցի չէ, պատերազմից հետո է տեղափոխվել Սիսիան՝ զոհված որդու երազանքն իրագործելու, և Բնունիս համայնքում հյուրատուն է բացել՝ «Էդգարի մոտ»։

Նա վերջերս է ամուսնացել սփյուռքահայ Ավո Մարտիրոսյանի հետ, Ալիկ Մարտիրոսյանն էլ, հավանաբար, ամուսնու ազգականն է։

Ջիվան Մարգարյանի ազատվելուց մոտ 1 ամիս անց դիմում է գրել նաև նրա որդին, որը Սիսիանում ՀԷՑ-ի իրացման հարցերով տնօրենի տեղակալն էր։

Նրան հետևել են Սիսիանի կառույցի 26 աշխատակիցներ, որոնք ՀԷՑ մասնաճյուղի լոկոմոտիվն էին՝ գործի գիտակներ, եւ հիմա աննախանձելի վիճակում է հայտնվել ՀԷՑ-ի Սիսիանի մասնաճյուղը։ Մեզ ասացին, որ հոր ազատվելուց հետո որդուն առաջարկել են կողմնորոշվել՝ կա՛մ մեզ հետ ես ու անդամագրվում ես ՔՊ-ին, կա՛մ ինքնակամ հեռանում ես: Իհարկե, դա անմիջականորեն Ռոմանոսը չի անում, այլ իշխանական մունետիկները փոխանցում են «վերևների» ուղերձը»: