«Փաշինյանի խոսքն ունի մեկ տողատակ՝ ադրբեջանական պայմանի կատարում»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Նիկոլ Փաշինյանն այսօր հայտարարել է, որ ժողովրդի համար Սահմանադրությունն ատելի է:
Կհնչի ասածս տարօրինակ, բայց՝ ուր էր թե: Եթե ժողովուրդը ատեր Սահմանադրությունը, դա գոնե կնշանակեր, որ ունի սահմանադրական կարգի խորքային գիտակցում, եւ ըստ այդմ չի ընդունում ներկայիս Սահմանադրությունը՝ իր ընդունման կամ փոփոխման ձեւերով, մինչեւ բովանդակություն:
Բայց, Հայաստանի ժողովուրդը Սահմանադրության հանդեպ թերեւս չունի ոչ մի զգացում, որովհետեւ Սահմանադրությունը գործնականում որեւէ կերպ չի հասել ժողովրդական հարթություն:
Ժողովրդական հարթություն հասնելու համար այն նախ պետք է ամրագրվեր այսպես ասած տնտեսա-քաղաքական վերնախավերի հարթությունում, երբ նրանք միմյանց միջեւ կգային սահմանադրական կարգի եւ հարաբերությունների շուրջ սկզբունքային, ռազմավարական պայմանավորվածությունների:
Դրան կհաջորդեր արդեն ժողովրդական շերտը, որտեղ մարդիկ անմիջական կենսակերպի մակարդակում շոշափեին ներպետական ու ներհասարակական հարաբերությունների սահմանադրականության ուժը:
Ժողովրդի «ատելության» մասին Նիկոլ Փաշինյանի խոսքը ունի ըստ էության մեկ տողատակ՝ ստեղծել այն միջավայրը, որում նա պետք է անմիջական օրակարգ բերի Սահմանադրության փոփոխության ադրբեջանական պայմանի կատարումը:
Այլ կերպ ասած՝ Հայաստանի Սահմանադրությունն «ատողն» Ադրբեջանն է, ոչ թե ժողովուրդը: Պարզապես, Նիկոլ Փաշինյանը չի կարող ասել այդ մասին: Չէ՞ որ Հայաստանի ԱԳ նախարարն է խորհրդարանում ասել, որ «հաստատված խաղաղությունը խնամելը» զգուշություն է պահանջում ամեն բառի նկատմամբ»: