«Դեռևս կան անհասկանալի պահեր, որոնք վերաբերում են մանրամասներին»․ Սոբհանի

«Վաշինգթոնում Հայաստանի և Ադրբեջանի միջև խաղաղության համաձայնագրի նախաստորագրումն այն է, ինչին մենք միշտ աջակցել ենք և ողջունել ենք: Այժմ ևս մեր աջակցությունն ենք հայտնում և ողջունում ենք այն»,- այս մասին այսօր հրավիրված հրաժեշտի ասուլիսի ժամանակ ասաց Հայաստանում Իրանի դեսպան Մեհդի Սոբհանին:

«Այդ հայտարարության մեջ զետեղված և ընդգծված է հինգ սկզբունք. դրանք այն սկզբունքներն են, որոնք միշտ մենք արտահայտել ենք և մեր աջակցությունն ենք հայտնել դրանց: Այդ հինգ սկզբունքներն են՝ ազգային ինքնիշխանությունը, տարածքային ամբողջականությունը, փոխադարձության սկզբունքը, իրավազորությունը և սահմանների անխախտելիությունը:

Իհարկե, այնտեղ կային նաև անհասկանալի պահեր, սակայն երկկողմ հանդիպումների և զրույցների ընթացքում, կարող եմ ասել, որ այդ անհասկանալի պահերը վերացան»,- նշեց դեսպանը՝ ընդգծելով, որ դեռևս կան անհասկանալի պահեր, որոնք վերաբերում են այն մանրամասներին, որոնց շուրջ քննարկում տեղի չի ունեցել:

«Այն, ինչ կարող եմ այսօր հստակ ընդգծել, հետևյալն է, որ ՀՀ կառավարությունը և իշխանությունները հստակորեն հայտարարել են, որ որևիցե գործողություն կամ քայլ չեն ձեռնարկի, որը չի բխի երկու երկրի շահերից:

Սերտ կապերի մեջ ենք ՀՀ իշխանությունների հետ, որպեսզի այդ քննարկումների և հանդիպումների ժամանակ տեղեկացված լինենք այն մանրամասների վերաբերյալ, որոնց մասին հետագայում կխոսվի: Երկու երկրներիի իշխանությունների միջև կա ընդհանուր փոխըմբռնում»,- նշեց դեսպանը: