«Եթե օրենքը «բռնաբարողը» պաշտոնի առաջխաղացում է ունենում, պեդոֆիլն էլ մանկապարտեզի վարիչ կնշանակվի»․ Ագնեսա Խամոյանը՝ Նիկոլ Փաշինյանին

«ՄԻԵԴ-ում քննարկել ենք դատաիրավական համակարգի հետ կապված խնդիրներ, արդարադատության ոլորտի պրոբլեմներ, անհատ անձանց վերաբերյալ քննարկում չի եղել»,- ԱԺ-ում հայտարարել է Նիկոլ Փաշինյանը՝ պատասխանելով ընդդիմադիր դաշինքի անդամ Ագնեսա Խամոյանի հարցին, թե արդյոք ՄԻԵԴ նախագահի հետ քննարկվել է դատավոր Արմեն Դանիելյանի գործը։

Ի պատասխան՝ ընդդիմադիր պատգամավորը նշել է․ «Արմեն Դանիելյանին ամենավերջին որակումներն եք տվել, հետո ձեր խմբակցությանը ստիպել եք իրեն ընտրել Վճռաբեկի դատավոր, որովհետև պարտք եք ունեցել իրեն։ Սրանից հետևություն եմ անում․ եթե ձեր իշխանության օրոք օրենքները, Սահմանադրությունը «բռնաբարողը» կարող է պաշտոնի առաջխաղացում ունենալ, ապա վաղը պեդոֆիլներն էլ կարող են մանկապարտեզի վարիչ նշանակվել»։

Փաշինյանը հակադարձել է. «Ձեր իշխանության ժամանակ կար այդպիսի դեպք, երբ պեդոֆիլը հանրապետության թիվ մեկ ներդրողն էր, թիվ մեկ բարերարը»։