«Գյումրեցու հիշողություններում ձեր մասին ոչ մի լավ լեգենդ չկա»․ Դավիթ Առուշանյան

Շիրակի մարզպետ Դավիթ Առուշանյանի ֆեյսբուքյան գրառումը․ «Տխրահռչակ քաղաքական անցյալը մոռանալը բարդ է, անհնար, բայց ձևացնելը, թե մոռացել ես՝ կարծես հեշտ է: Այսօր համոզվեցինք:
Գյումրու քաղաքապետը, որ պարզվում է՝ լեգենդների մեծ սիրահար է, ինքն իր լեգենդն է հնարել, հավատում է դրան կուրորեն, բարձր խոսում է դրա մասին՝ մոռանալով, որ մարդիկ չար կերպարներին միշտ հիշում են և ոչ միայն...:
Վստահ եմ՝ գիտեք, որ գյումրեցու հիշողություններում ձեր մասին ոչ մի լավ լեգենդ չկա:
Մեր երկրի ինքնիշխանությունը այլընտրանք չունի:
Անքննարկելի այս փաստը, փաստորեն, կանգնել է այն մարդկանց կոկորդին, որոնք ամբողջ քաղաքական ուղին անցել են թելադրանքի հետևելով, մարիոնետային սկզբունքով:
Եվ հիմա, լավ իմանալով, որ այս իրողության դեմ մարտնչելը պարզապես անիմաստ է, կախվել են փրփրուրներից՝ դատարկաբանելով ու հանրության առաջ դարձյալ դեմքն ու իրական ձգտումները ի ցույց դնելով: Բացեիբաց եք խոստովանում, որ ինքնուրույն, կայուն ու անկախ երկիրը անընկալելի է ձեզ համար, իսկ հպատակ լինելը մտածողություն է, ապրելակերպ:
Այնպես, ինչպես ապրել եք դուք, և ձեր քաղաքական հովանավորները՝ անհամատեղելի են այն պետության մոդելի հետ, որը այսօր իրականություն է դառնում մեր երկրում:
Դադարե՛ք ինքնախայտառակվել և զուր հույսեր փայփայել: Հայաստանը ինքնիշխան հանրապետություն է:
Եվ ուրեմն, հանգիստ, հանդարտ, ինստիտուցիոնալ լուծումներով կշարժվենք առաջ»: