«44-օրյայի զեկույցը պետք է մտնի լիագումար նիստ»․ Անդրանիկ Քոչարյանը դեմ է փակ քննարկմանը

«Եթե 44-օրյայի զեկույցը չի մտնում լիագումար նիստ և այլ տարբերակով է քննարկվում, նշանակում է այն գոյություն չունի»,- այսօր լրագրողների հետ զրույցում ասաց ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։ Նրա խոսքով, թեպետ մի քիչ երկարել է զեկույցը ներկայացնելը, սակայն նման պարագայում օրենքով կարգավորման տարբերակ կա և հնարավոր է մտցնել լիագումար նիստի օրակարգ։ Քոչարյանը արձագանքեց Ալեն Սիմոնյանի այն հայտարարությանը, թե զեկույցը պատշաճ կերպով չի հանձնվել․ «Ներկայացվել է քարտուղարության միջոցով, ես այլ տարբերակ չգիտեմ»,- ասաց Քոչարյանը։
Անդրադառնալով զեկույցի՝ փակ ֆորմատով քննարկմանը, Քոչարյանն ասաց․ «Ո՞ր կետի համաձայն։ Եթե լիագումար չի մտնում, առկախված է մնում, նշանակում է զեկույցը գոյություն չունի։ Եթե ասում ենք ժամկետնանց է և զեկույցը գոյություն չունի, ուրեմն ի՞նչ ենք զեկուցելու։ Փակ քննարկում կարող եմ հենց հիմա ես էլ կազմակերպեմ։ Բայց սահմանադրական օրենքի պահանջը լրիվ այլ է, լիագումար նիստում դրա իրավական ուժը պետք է կիրառվի։ Եթե հաջորդ խորհրդի նիստում որոշում չի լինի, ապա իրավաբանները պետք է հարցին պատասխան տան»,- ասաց Քոչարյանը՝ նշելով, որ խնդիրը քաղաքական չէ, այլ իրավական,որի լուծումները կգտնվեն։