«Ալիևին ուզում են ցույց տալ իրենց «покорный» վիճակը». Հակոբ Ասլանյան

«Որպես պատմաբան և որպես մարդ ես չեմ հավատում օգոստոսի 8-ի խաղաղության համաձայնագրին, որովհետև մինչև հիմա ինչ ասվել է , խաբկանք է եղել։ Խաղաղություն հաստատված չէ։ Խաղաղությունը մի օրում չեն հաստատում, այն պետք է տևական լինի։ Խաղաղությունը պարտադրվում է, պետք է լինես ուժեղ»,- այս մասին «24Նյուզ»-ի հետ զրույցում նշեց ԱԺ պատգամավոր Հակոբ Ասլանյանը:

Նրա դիտարկմամբ՝ այն, որ «Խաղաղության մասին հայտարարության նախագծի համար արտահերթ նիստ է հրավիրել ՔՊ-ն, դրանով Ալիևին ուզում են ցույց տալ իրենց «покорный» վիճակը․ «Որ Իլհա՛մչիկ, մենք կանենք այնպես, ինչպես դու ուզում ես»․ ցավում եմ, բայց իրողություն է դա»:

«Վարչապետը մինչև հիմա ռեալ չի բացատրել, թե ինչ է նշանակում «Զանգեզուրի միջանցքը», ու միջազգային արենայում էլ հոխորտալով խոսում է, թե ինչո՞ւ եք ասում «Զանգեզուրի միջանցք»։ Առաջին հերթին, պարոն վարչապետ, դու Ալիևի բերանը պետք է փակես։ Ոչինչ չներկայացնող հայտարարություններ չպետք է անել, այլ պետք է ասել՝ իմ ժողովրդի պահանջներն էլ սրանք են, ես իմ ժողովրդի ցանկությունը պետք է իրականացնեմ, ոչ թե քո»,- ընդգծեց պատգամավորը: