«Ռոբերտ Քոչարյանի ներսում ուրիշ երկիր է ապրում, ուղեղն ուրիշ տեղից է «կոնտրոլ» արվում»․ Հայկ Կոնջորյան

«Ռոբերտ Քոչարյանը կապ չունի ՀՀ ինքնիշխանության հետ, նրա համար դա բնականաբար համարվում է միջանցք»,- Civic-ի հետ զրույցում ասել է ԱԺ ՔՊ խմբակցության ղեկավար Հայկ Կոնջորյանը՝ արձագանքելով Սյունիքով անցնող ճանապարհի վերաբերյալ երկրորդ նախագահի հայտարարություններին․ «Ռոբերտ Քոչարյանն ապրում է Հայաստանում, բայց Հայաստանը չի ապրում նրա մեջ։ Ռոբերտ Քոչարյանի ներսում ուրիշ երկիր է ապրում, նրա ներսում ուրիշ երկիր է թելադրում, նրա սրտում ուրիշ երկրի սերն է բաբախում։ Հետևաբար, որքան ՀՀ-ի համար վատ, այնքան Քոչարյանի համար լավ»,- ասել է Կոնջորյանը։

Դիտարկմանը, թե Քոչարյանը հայտարարում է, որ միջանցք է տրվել ու «կոնտրոլը» ԱՄՆ-ին է հանձնվելու, Կոնջորյանն արձագանքել է․ «Կա հռչակագիր, որտեղ գրված են այն բոլոր սկզբունքները, որով պետք է կոմունիկացիաների վերաբացումը տեղի ունենա։ ՀՀ-ի տարածքում վերահսկողություն կարող են իրականացնել միայն ՀՀ համապատասխան ծառայությունները, որևէ երկրի ծառայություն չի կարող ՀՀ-ի տարածքի վրա «կոնտրոլ» իրականացնել։ Քանի որ իր ուղեղն ուրիշ տեղից է «կոնտրոլ» արվում, դրա համար մտածում է՝ ՀՀ-ի տարածքն էլ պետք է ուրիշ տեղից «կոնտրոլ» արվի»,- ասել է Կոնջորյանը՝ հավելելով, որ Քոչարյանի համար ՀՀ-ն միշտ էլ եղել է տարածք, որը կարելի է ինչ-որ մեկին վարձակալությամբ տալ։