«ՀԱՄԱՍ-ը ոչնչացված չէ, այլ՝ համաձայնության կողմ․ սա Իսրայելի «պարտությունն» է»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Թրամփը հայտարարել է, որ Իսրայելն ու ՀԱՄԱՍ-ը ստորագրել են Գազայի կարգավորման թրամփյան պլանի առաջին փուլի մասին համաձայնությունը: Թրամփը հայտարարել է, որ դա պատմական է արաբական, մահմեդական աշխարհի, Իսրայելի և ԱՄՆ համար: Նա շնորհակալություն է հայտնել Կատարին, Եգիպտոսին ու Թուրքիային՝ աջակցության համար:

Ստորագրման հանգամանքը հաստատել է նաև ՀԱՄԱՍ-ը, կոչ անելով իրականացնել համաձայնությունները: Ըստ պլանի, ՀԱՄԱՍ-ը պետք է ազատ արձակի պատանդներին, իսկ Իսրայելը՝ հետ քաշի զորքը համաձայնեցված գծերին:

ՀԱՄԱՍ-ը շնորհակալություն է հայտնել Կատարին, Թուրքիային ու Եգիպտոսին՝ կարգավորման աջակցության համար, ինչպես նաև նշել Թրամփի ջանքերը:

Այդպիսով, եթե համաձայնությունը մտնի ուժի մեջ ու պահպանվի, դա իսկապես կլինի նշանավոր իրադարձություն: Հիշեցնեմ, որ Գազայի շուրջ իրավիճակում դարձյալ եղել են հրադադարի վերաբերյալ համաձայնություններ, որոնք սակայն խախտվել են կարճ ժամանակահատվածում:

Իհարկե այդ համաձայնությունների անտուրաժը չի եղել այնպիսին, ինչպես Թրամփի պլանի դեպքում: Այստեղ սակայն առավել մեծ դեր ունի թերեւս այն, որ Թրամփի համար շատ կարևոր է քարոզչական էֆեկտը:

Իհարկե բոլորովին նկատի չունեմ, որ նախկին՝ չպահպանված համաձայնությունները եղել են ներկայիս պլանի հետ ամբողջապես նույնական, սակայն ընդհանուր առմամբ խնդրո առարկան այն է, որ իրավիճակը պահանջում է բավականին մեծ թվով շահառուների համաձայնություն, եւ այդտեղ է, որ երկարաժամկետությունը մշտապես ենթակա է կասկածի: Սա է նաեւ պատճառը, որ Մերձավոր Արևելքը մշտական աշխարհաքաղաքական «խառնարան» է:

Հասկանալի է, որ, եթե օրինակ Գազայի համաձայնությունը չտեղավորվի ընդհանուր ռեգիոնալ անվտանգության՝ համապարփակ ճարտարապետության շրջանակում, որտեղ կբալանսավորվեն բոլոր առանցքային խաղացողների շահերը, ապա հրադադարը միշտ լինելու է ռիսկի տակ: Այդ ռիսկը կարող է պայթել մեկ շաբաթ, մեկ ամիս, մեկ տարի կամ մի քանի տարի անց, բայց կպայթի, եթե չտեղավորվի ռեգիոնալ համապարփակ ճարտարապետության շրջանակում:

Միևնույն ժամանակ, անհրաժեշտ է գուցե այս պահին նկատել մի նյուանս՝ ՀԱՄԱՍ-ը ոչնչացված չէ, այլ համաձայնության կողմ է: Այս նյուանսը էական է երկու առումով: ՀԱՄԱՍ-ը թերևս վաղուց հենց բազմակողմ շահերի կրող կառույց է և իր գոյության կենսունակ բանաձև է դարձրել թերևս հենց այդ բազմակողմությունը: Եվ մյուսը՝ Նաթանյահուն պարբերաբար հայտարարում էր ՀԱՄԱՍ-ը ոչնչացնելու նպատակի մասին, բայց այսօր դե ֆակտո համաձայնություն է կնքում ՀԱՄԱՍ-ի հետ:

Սա անկասկած Իսրայելի «պարտություն» է, որքան էլ Գազայի ավերը դիտարկվում է նրանց ռազմական հաղթանակ: Քաղաքական առումով Իսրայելը շարունակում է պարտվել: Թրամփի պլանը ըստ էության այդ պարտության արագ ընթացքը դանդաղեցնելու մի քայլ է:

Բոլոր պարագաներում անկասկած է մի բան, որ հրադադարի անգամ մեկ օրը փրկում է տասնյակ անմեղ կյանքեր, հատկապես անմեղ երեխաների, որոնց իսրայելական ռեժիմը՝ Նաթանյահուի գլխավորությամբ, նպատակային կերպով սպանել է հազարներով:

Ըստ տարբեր տվյալների, իսրայելական վարչակարգի ռազմական գործողությունների հետեւանքով Գազայում զոհվել է գրեթե 20 հազար երեխա, տարբեր աստիճանի վիրավոր երեխաների թիվը եղել է 40 հազար»: