«Առաջիկա ընտրություններում բանավեճի թեման լինելու է խաղաղությունը»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Խորհրդարանական առաջիկա ընտրություններում, կարծում եմ, բանավեճի հիմնական թեման լինելու է խաղաղությունը:
Այս օրակարգը հրապարակ է բերել իշխող քաղաքական ուժը՝ 2020-ից սկսված մեր անվերջանալի թվացող և մինչև այսօր շարունակվող պարտություններից հետո, որի հիմնական մեղավորն ու պատասխանատուն իշխող քաղաքական ուժն է:
Եթե ընդդիմությանը չհաջողվի այլ օրակարգ մեջտեղ բերել և դրա շուրջ ծավալել քարոզարշավը, ինչի հնարավորությունը նվազ է, և հիմնական օրակարգն ու բանավեճը մնալու է խաղաղությունը, ապա չկողմնորոշված ընտրազանգվածին իր կողմը քաշելու համար ընդդիմությունը պետք է կարողանա պարզ, իրատես կերպով պատասխանել հետևյալ հարցերին.
ա/ ո՞ր կետից է շարունակելու բանակցությունները Ադրբեջանի հետ,
բ/ Թուրքիայի հետ ի՞նչ քաղաքականություն է որդեգրելու,
գ/ ինչպե՞ս է վերանորոգելու Ռուսաստանի հետ լարված հարաբերությունները,
դ/ Արաքսի երկայնքով՝ Ադրբեջանն ու Նախիջևանը և ապա Թուրքիան միմյանց կապող ճանապարհի հարցում ի՞նչ փոփոխություններ է բերելու:
Հինգ տարի շարունակվող պարտություններն ու մղձավանջը Հայաստանի ժողովրդին օդերից իջեցրել է գետին, և մարդիկ այլևս լուրջ չեն ընկալում, եթե չասեմ՝ վտանգավոր են համարում, «Ոսկեպարով՝ Արցախ», «հավաքական վերադարձ» և նման ձևակերպումներ:
Իշխանությունների տեսակետը շատ պարզ է, և եթե դա խտացնենք, կունենանք հետևյալ ձևակերպումը՝ խաղաղություն՝ ամեն գնով:
Անգամ ընտրությունների օրը ընտրազանգվածի մի մեծ հատված կողմնորոշված չի լինում, հետևաբար, շատ կարևոր է, թե ինչպիսին է լինելու ընդդիմության ուղերձը վերը նշված հարցերին հստակ պատասխաններ տալու առումով»: