«Կայսրությունների քաղաքականությունը կերպարանք է ստանում Թաթոյանների, Տաշիր Սամոների ու դաշնակների տեսքով»․ Արթուր Հովհաննիսյան

ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանի ֆեյսբուքյան գրառումը․ «Կա՛մ Ռուսաստան, կա՛մ Թուրքիա․ փակուղի և ոչ երբեք ընտրանք։
Հարյուրամյակներով հայ ժողովրդին մատուցված այս երկընտրանքը իրականում միջոց է եղել մեզ կառավարելու, եթե ոչ՝ ստրկացնելու, մեզ անկախությունից զրկելու, եթե ոչ՝ դատապարտելու, մեզ ապրելու ձև թելադրելու, եթե ոչ ոչնչացնելու համար։
Պատմական այս հեռավորությունից մենք հստակ տեսնում ենք, թե ինչ աղետալի հետևանքների ենք հանդիպել՝ արժեհամակարգեր, քաղաքակրթական կողմեր ընտրելու փոխարեն ուժային բևեռներ ընտրելով, սեփական քաղաքական մտքով առաջնորդվելու փոխարեն՝ օտարածին քաղաքական շահեր սպասարկելով։
Այսօր էլ կայսրությունների վարած այս քաղաքականությունը դեռ շարունակվում է, և իր կերպարանքն է ստանում տարբեր քաղաքական ուժերի՝ Ռոբերտ Քոչարյանների, Սերժ Սարգսյանների, Արման Թաթոյանների, Արթուր Վանեցյանների, Տաշիր Սամոների, վերջիվերջո, դաշնակների տեսքով։ Ու նրանք հայ ժողովրդին արդեն անթաքույց կերպով ասում են՝ կա՛մ միութենական պետություն ես, կա՛մ թրքահպատակ շանորդի՝ չհասկանալով անգամ, որ, նման բան ասելով, կամա, թե ակամա, վերածվում են Հայաստանը միութենական պետության կազմում տեսնել երազող շանորդիների։
Բայց Հայաստանն այլևս շրջել է պատմության թափանիվը, հայկական քաղաքական միտքն այլևս ինքնուրույն է ու բխում է բացառապես Հայաստանի պետական շահից։
«Կա՛մ Ռուսաստան, կա՛մ Թուրքիա» հարցադրումը որևէ կողմին ընտրելու մասին չէ, այլ որևէ այլ կողմ չտեսնելու, անգամ ինքդ քեզ չտեսնելու մասին է, մեզ մեր վախերի ու երազանքների մեջ շղթայելու մասին է:
Եվ այստեղ մենք ընտրելու հարց բացարձակապես չունենք:
Հայ ժողովրդը ընտրել և ընտրում է ժողովրդավարությունը, կրթությունը, նորարությունը, քաղաքակրթությունը, խաղաղությունը, հայ ժողովրդն ընտրում է Հայաստանի ազատ և ինքնիշխան հանրապետություն»։