«Բաքուն կողմ էր երկաթուղու երկայնքով ռուսական զորքերի տեղակայմանը, ինչը մեզ համար անընդունելի էր»․ Արարատ Միրզոյան

ՀՀ արտաքին գործերի նախարար Արարատ Միրզոյանը DW-ին տված հարցազրույցում հայտարարել է , որ Ադրբեջանը բանակցությունների ընթացքում փորձել է Սյունիքի տարածքի համար ստեղծել ինչ-որ արտատարածքային միջանցք․ «Օրինակ, նրանք պահանջում էին, որ այս երկաթուղու երկայնքով տեղակայվեն երրորդ երկրի զինված ուժեր։ Հիշում եմ, թե ինչպես էին նրանք ասում, որ երկաթուղու երկայնքով պետք է տեղակայվեն ռուսական զորքեր։ Սա մեզ համար անընդունելի էր։ Միջանցք չկա, այլ կա TRIPP՝ Միջազգային խաղաղության և բարգավաճման Թրամփի երթուղի»,- ասել է Միրզոյանը՝ նշելով, որ տրանսպորտային հաղորդակցությունների և տարանցիկ ենթակառուցվածքների ապաշրջափակման հարցը ամբողջ բանակցային գործընթացի ամենակարևոր կողմերից մեկն է և որ ենթակառուցվածքները պետք է շահագործվեն տարածքային ամբողջականության, սահմանների անձեռնմխելիության և ինքնիշխանության համաձայն։