«Ընդդիմությո՛ւն, վերջապես արեք երեք նվազագույն վարժություն». Վլադիմիր Մարտիրոսյան

Քաղաքագետ Վլադիմիր Մարտիրոսյանի ֆեյսբուքյան գրառումը. «Տեղի է ունենում Հայաստանի Երրորդ Հանրապետության փակում: Ինձ առանձնահատուկ զարմացնում է այս իշխանությանը օրենքին, իրավունքին, սահմանադրականությանը, ժողովրդավարությանը հավատարիմ լինելու կոչ անողների և դրանք խախտելու մեջ զարմացած և էմոցիոնալ մեղադրողների կամ դեռ իրավաբանորեն խոսողների քաղաքական նաիվությունը:
Հարգելիներս, ներքին լեգիտիմության բազան արտաքին լեգիտիմության բազայով փոխարինած և բացառապես ուժայիններով կառավարող Փաշինյանի համար վերը նշված ժողովրդավարական արժեքներն ու ինստիտուտները խանգարող հանգամանքներ են այլևս և մեծ ճոխություն: Դրանց հետևելու և դրանց պահպանման առումով նա ոչ միայն շահագրգռված չէ, այլ թե՛ տեսականորեն և թե՛ պրակտիկորեն դրանց հետևելու պարագայում նա չի կարող ո՛չ իշխանություն պահել և ո՛չ էլ վերարտադրվել:
Դուք ստիպում, խնդրում և հորդորում եք նրան սեփական ձեռքերով կտրել այն ճյուղը, որի վրա նա նստած է և զարմանում, որ նա դա չի անում:
Հարգելի ընդդիմություն, արեք վերջապես երեք նվազագույն վարժություն:
1.Ձևավորեք վերջապես միջընդդիմադիր «Փոխաջակցության դաշինք»:
2. Ստանձնեք Հայ Առաքելական Եկեղեցու հանրային և քաղաքական պաշտպանության հանձնառություն:
3. Հայտարարեք, որ դուք եք Հայաստանի Երրորդ Հանրապետության քաղաքական պահապանները:
P.S. Սա է օրակարգը: Ընդունեք վերը նշված երեք կետերով մարտահրավերը բաց և մշակեք քաղաքական պաշտպանության և հակահարձակման պլան: Նա ունի անելիք, Ձեր անելիքը նրա անելիքի անթույլատրելիությունը, ժողովրդավարական անընդունելիությունը և հակասությունը ցույց տալը չէ միայն, այլ նրա անելիքին հակադրվելը, դրա դիմաց ՊԱՏՆԵՇԻ ԿԱՌՈւՑՈւՄԸ՝ վերը նշված մինիմալ հանձնառությունները ստանձնելով»: