Ինդոնեզիայում հազվագյուտ տապանուլի օրանգուտանները ոչնչացման եզրին են ոսկու արդյունահանման պատճառով

Տապանուլի օրանգուտանները ոչնչացման եզրին են Ինդոնեզիայում ոսկու արդյունահանման պատճառով։ The Guardian-ի փոխանցմամբ՝ բնապահպանները կոչ են անում փակել հանքը, որը վնասում է կենդանիներին և վերջերս սկսել է միայն ընդլայնվել։

Այս կապիկի տեսակը աշխարհում ամենահազվագյուտն է և հայտնաբերվել է 2017 թվականին: Ներկայում մնացել է 800-ից պակաս տապանուլի օրանգուտան այն տարածքում, որը կազմում է նրանց պատմական արեալի 2,5%-ը։ Նրանք բոլորն էլ ապրում են Սումատրայի Բաթանգ Տորու էկոհամակարգում՝ սահմանակից Մարտաբեի ոսկու հանքի հարավարևմտյան թևին, որը բացվել է 2012 թվականին։

Բնապահպանական ոչ առևտրային Mighty Earth կազմակերպության տվյալներով՝ հանքի ընդլայնման պլանավորված տարածքի մոտ կան տասնյակ օրանգուտանների բներ։ Գիտնականները պնդում են, որ դա կհանգեցնի կենդանիների ոչնչացմանը մի քանի սերունդների ընթացքում, քանի որ նրանք բազմանում են յուրաքանչյուր վեցից տասը տարին մեկ։

Հանքի օպերատոր Պ.Տ. Աժենկուրտը նշել է, որ ընդլայնումը կազդի վեցից տասներկու օրանգուտանի վրա: «13 տարվա գործունեության ընթացքում մենք չենք ունեցել օրանգուտանների մահվան ոչ մի դեպք, որը ուղղակիորեն պայմանավորված է հանքարդյունաբերական գործունեության հետ», - նշել են նրանք։

Այնուամենայնիվ, հետազոտությունները ցույց են տալիս, որ նույնիսկ անուղղակի ազդեցությունները կարող են հետևանքներ ունենալ: Էգ օրանգուտանները հատկապես զգայուն են բնակավայրի փոփոխության նկատմամբ, ուստի նրանք չեն տեղաշարժվում, երբ կորցնում են իրենց բնակության տարածքի մի մասը: Սա նրանց ենթարկում է սովի վտանգի: Տարբեր պրիմատների խմբերի միջև բախումները նույնպես կարող են հանգեցնել լարվածության և հակամարտությունների: