ՔՊ-ում լարված են. թեկնածուներից «բացատրություններ» են պահանջում. «Ժողովուրդ»

ՔՊ իշխանության ներսում վերջին օրերին նկատվում է գերլարված իրավիճակ։ «Ժողովուրդ»-ի աղբյուրների փոխանցմամբ, «Քաղաքացիական պայմանագիր» կուսակցության վարչությունում գրեթե ամենօրյա ռեժիմով իշխանության ներկայացուցիչները հանդիպումներ են ունենում վարչության անդամների հետ՝ պահանջելով պարզաբանումներ ոչ միայն քաղաքական դիրքորոշումների, այլև անձնական կյանքում առկա իրավիճակների վերաբերյալ։
«Մեր աղբյուրների պնդմամբ, վարչապետ Նիկոլ Փաշինյանի հանձնարարությամբ կուսակցական շրջանակներում իրականացվում է յուրօրինակ «ստուգում»՝ անձնական կապերի, ընտանեկան կարգավիճակի ու հարաբերությունների մասով, իսկ դրանից հետո հնչեցվում են «խաչաձև» հարցադրումներ՝ ակնարկելով, թե տվյալ անձանց վերաբերյալ կա բացասական տեղեկություն, որը կարող է անընդունելի լինել ՔՊ նախընտրական ցուցակում ընդգրկվելու համար։
Ըստ նույն աղբյուրների՝ նման քննարկումների հետևանքով արդեն արձանագրվել են դեպքեր, երբ կուսակցության ներսում որոշ թեկնածուների վերաբերյալ տրվել են բացասական գնահատականներ ու մերժումներ։
Միաժամանակ, մեր տեղեկություններով, ՔՊ-ական շրջանակներն ակտիվ պատրաստվում են դեկտեմբերի 27-ին նախատեսվող քաղաքական հավաքին «Ադանա» շքեղ ռեստորանում՝ օրակարգում պահելով 2026 թվականի խորհրդարանական ընտրությունների կազմակերպչական հարցերը եւ առաջիկա քաղաքական քայլերի «փաթեթը»։

Նշենք, որ ՔՊ-ն սեպտեմբերյան համագումարից հետո ունի 20-հոգանոց վարչություն, դեկտեմբերի 4-ին էլ հրապարակային հաղորդվել էր՝ կուսակցական հարթակում քննարկվել է 2026-ի ընտրություններին համամասնական ցուցակի ձեւավորման կարգը»։