Եվրոմիությունը կարող է արգելել ռուսական բոլոր կրիպտոարժույթային հարթակները

Եվրոհանձնաժողովն առաջարկել է արգելել Ռուսաստանի հետ կապված բոլոր կրիպտոարժույթային գործարքները, հաղորդում է Financial Times-ը՝ հղում անելով Ռուսաստանի դեմ նախատեսված պատժամիջոցների վերաբերյալ հանձնաժողովի փաստաթղթին։
Թերթի տվյալներով՝ Եվրոհանձնաժողովն առաջարկել է արմատական ​​միջոցներ ձեռնարկել՝ ռուսական կրիպտոարժույթային հարթակները արգելելու փորձերի փոխարեն։

Հանձնաժողովը կարծում է, որ առանձին կրիպտոակտիվների ծառայություններ մատուցողների նկատմամբ պատժամիջոցների կիրառումը, հավանաբար, կհանգեցնի նոր կազմակերպությունների ի հայտ գալուն դրանց փոխարեն։

«Որպեսզի պատժամիջոցները հասնեն իրենց նախատեսված ազդեցությանը, [ԵՄ-ն] արգելում է ցանկացած կրիպտոակտիվների ծառայություն մատուցողի հետ փոխգործակցությունը կամ Ռուսաստանում ստեղծված ցանկացած հարթակի օգտագործումը, որը հնարավորություն է տալիս փոխանցել և փոխանակել կրիպտոակտիվներ, որոնք հիմնված են Ռուսաստանում», - նշվում է փաստաթղթում։

FT-ն ենթադրում է, որ ԵՄ առաջարկներն ուղղված են ռուսական A7 վճարային հարթակին, ինչպես նաև դրան կապված A7A5 կայուն կրիպտոարժույթին, որը կապված է ռուբլու հետ։

Որպեսզի նոր պատժամիջոցներ ընդունվեն, ԵՄ բոլոր անդամ պետությունները պետք է աջակցեն դրանց։ Երեք դիվանագետների խոսքով՝ դաշինքի 27 երկրներից երեքը վերապահումներ են հայտնել և լրացուցիչ տեղեկություններ են խնդրել, հաղորդում է FT-ն։