««Պլինտուսի» մակարդակի բանավեճերին ենք ականատես լինելու»․ Արմենուհի Վարդանյան

Լրագրող Արմենուհի Վարդանյանի ֆեյսբուքյան գրառումը․ «Զարմանում եմ, որ մարդիկ միայն հիմա են զարմանքով արձանագրում ձևավորված խորհրդարանի որակական անկումը։ Ամիսներ առա՞ջ չէր քարոզարշավը համբալների, համբալներին «կզցնելու» և այլնի մասին։ Իսկ ի՞նչ էիք սպասում։
Երևի սպասվում էր, որ Նիկոլը չի՞ ընտրվի, կամ եթե ընտրվի, ընդդիմությունը մի բան կանի, կամ որ ընդդիմադիրները չէի՞ն վերցնի մանդատները և չէի՞ն գնա խորհրդարան։ Հայաստանյան հասարակական-քաղաքական խճանկարին քիչ թե շատ ծանոթ, ձևավորված ցուցակների պարունակությանը ծանոթ մարդը, իհարկե, նման ակնկալիք ի սկզբանե պետք է չունենար։ Շատ չէ, ընդամենը 10 անուն թվարկեք հայաստանյան քաղաքական/հասարակական դաշտից, ովքեր «մահապարտ» են, ովքեր չեն գայթակղվի փողով, ովքեր բարոյական և էթիկական բարձր ստանդարտներ ունեն, ովքեր հանուն «հանունների» պատրաստ են զոհասեղանին դնել և կորցնել շատ բան։ Ես չեմ կարող թվարկել, ցավոք....Եթե կարող եք, օգնեք ինձ խնդրում եմ հիշել...
Նախորդ խորհրդարանում տեսանք չէ՞, ինչպես աշխատեց ընդդիմությունը՝ իշխանության հետ հավասար կիսելով պարգևավճարներն ու գործուղումները։
/Ավելի քան 600 միլիոն դրամ/1,5 մլն դոլար պարգևավճար են ստացել աշխատավարձերից բացի/
Հիմա որակական թռի՞չք էր լինելու, ինչպե՞ս էր լինելու այդ թռիչքը։ Երբ ցանկացած ցինիկ վարք և երևույթ դառնում է հասարակական նորմ, այդ ի՞նչ էվոլյուցիայի էինք սպասում։
Սոցիոլոգիայում կա կակոկրատիա հասկացությունը՝ վատագույնների իշխանություն։ Երբ քաղաքական համակարգում սկզբունքներին ու գաղափարներին փոխարինում է հարմարվողականությունը, յուրաքանչյուր հաջորդ սերունդ ավելի ցածր նշաձող է սահմանում, քան նախորդը: Սա հանգեցնում է նրան, որ քաղաքական երկխոսության մակարդակը, էթիկան և պատասխանատվությունը ամենուր, իսկ այս դեպքում նաև խորհրդարանում աստիճանաբար արժեզրկվում են, և այն, ինչ նախկինում անընդունելի էր համարվում, դառնում է նոր նորմ(
Ոչ ադեկվատ վարքով մեկը, ով բազմաթիվ անդառնալի տապալումներ է թույլ տվել, քարոզարշավին էլ նույնքան հիստերիկ վարքով «կզցնել» ու ունեզրկելու մասին հայտարարություններով, Արցախի ու արցախցիների դեմ արված ամոթալի ասելիքով է շահել իր ընտրողի քվեն, կրկին դարձավ վարչապես։ Այս հանգամանքը քի՞չ բան է խոսում բարոյական անկման մասին....
Եղած ընդդիմությունն էլ մասնակցել է այս ֆարսին և եկել է ԱԺ մանդատ կիսելու ու իբրև թե սուր հարցադրումներ տալով, տարիներ մաշեցնելու...
Իսկ այս ընթացքում մենք կորցրել ենք հայրենիք, միջազգային հեղինակություն և այլն... Բազմաթիվ կորուստներին գումարվել է նաև բարոյական անկումը, նոր գարշելի նորմեր ենք սահմանել՝ տարիներով հետ գլորվելով։
Հիմա «պլենդուզի» մակարդակի բանավեճերին ենք ականատես լինելու, ընդդիմությունը ձև է բռնելու, թե խրոխտ աշխատանքային մթնոլորտում է, իսկ ՔՊ-ն դառնալու է ավելի սանձարձակ, որովհետև ՔՊ մանրապճեղները հասկացել են, որ այդ վարքը լավ էլ պոպուլյար է, քվե է բերում։
Ինչև, ափսոս էինք»։