«Սա փոխում է տարածաշրջանային ուժերի հավասարակշռության միտումները»․ Արա Պողոսյան

Քաղաքագետ Արա Պողոսյանը ֆեյսբուքյան իր էջում գրել է․ «Օգոստոսի 7-ին Մեքքայում Թուրքիայի, Սաուդյան Արաբիայի և Պակիստանի միջև կնքվել է փոխօգնության պակտ, որի մասին թուրքական կողմը բազմիցս խոսել էր։ Պակիստանի և Սաուդյան Արաբիայի միջև նախկինում կնքված փոխադարձ պաշտպանության պակտին միանալու մասին Թուրքիայում էլի խոսել են ու այժմ կարծես թե դա իրականություն է դառնում։
Համաձայնագիրը ենթադրում էր, որ կողմերից մեկի վրա հարձակումը համարվում էր հարձակում նաև մյուս կողմերի նկատմամբ։ Եթե հաշվի առնենք, որ Սաուդյան Արաբիան նախկինում, իսկ Թուրքիան ներկայում ձգտել և ձգտում են ունենալ միջուկային զինանոց, իսկ Պակիստանն արդեն ունի այդպիսի զինանոց, սա փոխում է տարածաշրջանային ուժերի հավասարակշռության միտումները, ինչը հավասարապես մարտահրավեր է թե՛ Իրանի համար և թե՛ Իսրայելի։
Իրանի ԱԳՆ-ն արդեն իսկ արձագանքել է Թուրքիայի, Սաուդյան Արաբիայի և Պակիստանի միջև հնարավոր նոր դաշինքի մասին լուրերին։
ԻԻՀ արտաքին գործերի նախարար Աբբաս Արաղչին սակայն բավականին երկիմաստ հայտարարություն էր արել.
«Իրանի հզոր զինված ուժերը ցուցադրել են իրենց պատրաստվածությունը, կարողությունները և ուժը աշխարհի ամենահարուստ բանակների դեմ կանգնելով։
Երբ մահմեդականները միավորվում են, մենք կարող ենք վստահորեն դիմակայել ցանկացած արտաքին ուժերից եկող մարտահրավերի։
Ժամանակն է ապավինել միայն ինքներս մեզ և ընդունել իրական եղբայրությունը»։
Թեպետ այս հայտարարությունը առաջին հայացքից ենթադրում է ողջույն իսլամական աշխարհի միավորմանը, սակայն հաշվի առնելով Պակիստանի և Իրանի, Սաուդյան Արաբիայի և Իրանի, Թուրքիայի և Իրանի ինչպես քաղաքական, այնպես էլ քաղաքակրթական, կրոնական հակասությունները, կարծում եմ, որ սա դիվանագիտական ձևակերպում է արդեն կայացված փաստին։ Դիվանագիտական տեխնոլոգիան ենթադրում է՝ «եթե չես կարող կասեցնել քո շահերին սպառնացող վտանգը, ապա ձգտում ես դրանից օգուտ ստանալ և շահել ժամանակ»»։