«Օգոստոսի 2-ից առ այսօր միայն Մարտի 1-ի մասին եմ լսում ու Ռոբերտ Քոչարյանի․ դուք չեք հոգնե՞լ»․ Հայկ Ֆարմանյան

Արձագանքելով 2020թ․՝ որպես «Մեկ Հայաստան» կուսակցության անդամ լրատվամիջոցներից մեկին տված իր հարցազրույցի վերաբերյալ ԱԺ փոխխոսնակ Վահագն Ալեքսանյանի հարցին, «Ուժեղ Հայաստան»-ից Հայկ Ֆարմանյանն ասաց․ «Այո, կարծում եմ, որ ՀՀ ընդհանուր օրենսդրության շրջանակներում ապօրինություն թույլ տված անձանց հնարավոր է պատժել։ Երբ ապօրինի գույքի բռնագանձման մասին օրենք է ընդունվում, ինձ համար բազմաթիվ մութ հարցեր կան ու ես իմ անձնական կարծիքն ունեմ։ Այո, գտնում եմ, որ այդ օրենքը եղել է պատժի գործիք»։ Վահագն Ալեքսանյանն արձանագրեց․ «Այսինքն՝ եթե թարգմանենք, կստացվի, որ օրինակ Ռոբերտ Քոչարյանի ընտանքից երբ պահանջվում է 200 մլն դոլարի ապօրինի գույք, այդ էջը պետք է փակել ու չպահանջել, կամ Գագիկ Խաչատրյանից երբ պահանջվում են ահռելի մեծ գումարներ, այդ էջը պետք է փակել»։ Ֆարմանյանը նշեց․ «Ասացի՝ ընդհանուր օրենսդրության շրջանակներում միշտ եղել են մեխանիզմներ՝ ապօրինությունները բացահայտելու համար։ 8 տարի իշխանության եք, բացահայտեք, որևէ խնդիր չկա։ Հասարակական համերաշխության տեսանկյունից, այո, անցյալի էջը պետք փակվի։ Ես նոր պատգամավոր եմ ու օգոստոսի 2-ից առ այսօր միայն Մարտի 1-ի մասին եմ լսում ու Ռոբերտ Քոչարյանի․ դուք չեք հոգնե՞լ։ Չի կարելի անընդհատ խոսել Մարտի 1-ը, Հոկտեմբերի 27-ը․․․»։

Մանրամասները՝ տեսանյութում։

Հիշեցնենք՝ «Ուժեղ Հայաստան»-ը Ֆինանսավարկային ու բյուջետային հարցերի մշտական հանձնաժողովի նախագահի պաշտոնում առաջադրել է Հայկ Ֆարմանյանի թեկնածությունը։