«Եվրոպային կարտոֆիլի պակաս է սպառնում»․ #FT

Եվրոպան կբախվի կարտոֆիլի պակասի և դրա գների աճի՝ ամռանը գրանցված շոգի ալիքներից հետո, որոնք, ըստ վերլուծության, հանգեցրել են բերքի գրեթե 7 միլիոն տոննայի կորստի։ Այս մասին հայտնում է Financial Times-ը՝ հղում կատարելով Energy and Climate Intelligence Unit (ECIU) ոչ առևտրային կազմակերպության կանխատեսմանը։

«Վերլուծության համաձայն՝ ծայրահեղ եղանակային պայմանների պատճառով գրանցվել է մոտ 3,1 միլիոն տոննա կարտոֆիլի կորուստ՝ 400-ից 620 միլիոն եվրո արժեքով։ Դրան գումարվում է մոտ 3,6 միլիոն տոննա կարտոֆիլ, որը այս տարի ընդհանրապես չի աճեցվել՝ 2025 թվականի ռեկորդային բերքից հետո»,— գրում է թերթը։

Այսպես, ECIU-ի կանխատեսմամբ՝ Գերմանիայում, Ֆրանսիայում, Բելգիայում և Նիդերլանդներում՝ Եվրոպայի կարտոֆիլի արտադրության հիմնական երկրներում, բերքը կարող է անցյալ տարվա ռեկորդային 27,3 միլիոն տոննայից այս տարի նվազել մինչև 19,5-20,5 միլիոն տոննա։

Եթե այս գնահատականները հաստատվեն, ապա ընդամենը մեկ տարվա ընթացքում Եվրոպան կանցնի աճեցված կարտոֆիլի ռեկորդային առավելագույնից ռեկորդային նվազագույնի։ Ինչպես նշում է Financial Times-ը, անցյալ տարի առաջարկի ավելցուկը Բելգիայում կարտոֆիլի հենանիշային գինը գրեթե զրոյական մակարդակի էր հասցրել։ Այդ ժամանակ ֆերմերները չիրացված կարտոֆիլը դեն էին նետում, անվճար բաժանում, այրում կամ կերակրում անասուններին։