«Եթե միջազգային հանրությունն Ադրբեջանին օգներ ազատվել պատրանքներից, ԼՂ հակամարտությունը վաղուց լուծված կլիներ». Սերժ Սարգսյանը՝ ԵԽԽՎ-ում

Հայկական կողմն ու ադրբեջանականն, անշուշտ, ցանկանում են շուտափույթ կարգավորել Լեռնային Ղարաբաղի հակամարտությունը: Այս մասին այսօր ԵԽԽՎ նստաշրջանի 3-րդ նիստի ժամանակ՝ պատասխանելով Գերմանիայի ներկայացուցչի՝ 26 տարի ձգձգվող հակամարտության մասին հարցին, ասել է ՀՀ նախագահ Սերժ Սարգսյանը:

«Այդ ցանկությունների միջև հսկայական տարբերություն կա: Բանակցային գործընթացին խոչընդոտում են Ադրբեջանի առավելապաշտական և ոչ իրատեսական ակնկալիքները բանակցությունների ելքից»,- ասել է Սերժ Սարգսյանը:

Գերմանիայի ներկայացուցիչը հարց է ուղղել, թե ինչով կարող է միջազգային հանրությունն օգնել կողմերին:

Սերժ Սարգսյանի խոսքով՝ եթե միջազգային հանրությունն Ադրբեջանին օգներ ազատվել պատրանքներից և գալ իրատեսական դաշտ, ապա կողմերը մեծ հաջողությունների կհասնեին:

Կոնֆլիկտը նաև խոչընդոտում է ժողովուրդների զարգմացմանը, խլում մարդկային կյանքեր, խոչընդոտում է նաև այն, որ ձեռքբերված համաձայնությունները չեն կատարվում:

Սերժ Սարգսյանը խոսել է նաև 2016թ. Ադրբեջանի ագրեսիայի մասին, որի նպատակն էր վերադարձնել Արցախն ուժի կիրառմամբ: Նա նաև նշել է Սանկտ Պետերբուրգում, Ժնևում կայացած հանդիպումների մասին, որին ներկա էին կողմերի բարձրաստիճան ներկայացուցիչները, ԵԱՀԿ ՄԽ համանախագահները: Այդ առումով, ՀՀ նախագահի խոսքով, որոշում կայացվեց կենտրոնանալ վստահության վրա, պահպանել հրադադարի ռեժիմը, ընդլայնել ԵԱՀԿ-ի ղեկավարի մանդատը՝ խախտումների հետաքննության նպատակով: Սակայն դրանից հետո, ինչպես ընդգծել է Սերժ Սարգսյանը, Ադրբեջանի բարձրաստիճան պաշտոնյաները հայտարարեցին, որ դրանք իրենց հայտարարությունները չեն, և որ այդ հարցն Ադրբեջանի ներքին խնդիրն է, ինչն էլ, Սերժ Սարգսյանի խոսքով, իրատեսական հիմքեր չի տալիս կարգավորելու հակամարտությունը: