«Այո՛, պատրաստ ենք նաև ընդդիմություն լինել». Վահրամ Բաղդասարյան

«Դուք պատկերացնո՞ւմ եք՝ եթե պարալիզացված վիճակը ևս 10 օր շարունակվեր, ի՞նչ հետևանքներ կունենար.. Արել ենք հայտարարություն, հավատարիմ ենք դրան ու նկատի ունենալով երեք խմբակցությունների դիրքորոշումը, կօժանդակենք բավարար ձայներով, որ ամսի 8-ին ՀՀ-ն վարչապետ ունենա: Ապագայի հետ կապված քննարկումներ չենք ծավալել, իսկ քաղաքական գործընթացներն ամեն պահ փոփոխությունների են ենթարկվում»,- ԱԺ ճեպազրույցների ժամին հայտարարել է ՀՀԿ խմբակցության ղեկավար Վահրամ Բաղդասարյանը: «Փաշինյանը վստահ է, որ իր աշխատանքով կարող է մեր մտահոգությունները փարատել»,- հավելել է նա:

Հարցին՝ իշխող ՀՀԿ-ն դառնում է ընդդիմությո՞ւն, պատասխանել է. «Քաղաքականություն մտնողը եթե որոշում է՝ ամբողջ կյանքում պետք է լինի իշխանություն, ուրեմն մտել է իր հետաքրքրությունների համար, ու որևէ մեկը երաշխավորված չէ՝ երբ կլինի ընդդիմություն կամ իշխանություն: Այո, պատրաստ ենք նաև ընդդիմություն լինել, բայց որևէ անգամ չենք խանգարելու երկրի անվտանգությանը, հեռանկարային շահերին»:

Լրագրողները հետաքրքրվել են՝ պատկերացնո՞ւմ եք որպես ընդդիմություն որոնք ենք լինելու ձեր գործողությունները. «Եթե լինի կառավարության ծրագիրը, մեր քայլերը կկարգավորենք: Կարող է այն ծրագիրն են բերում, որը ՀՀԿ-ի ծրագիրն է, ի՞նչ կարող ենք անել»:

Վերջում հարց հնչեց Ռոբերտ Քոչարյանի հնարավոր դերակատարության մասին: Վահրամ Բաղդասարյանը հավաստիացրեց, որ 5 տարի չի տեսել նրան ու չի շփվել.

«Խնդրում եմ հանգիստ թողեք մեր նախկին նախագահներին: Քոչարյանը չի կարող քաղաքական ազդեցություն ունենալ ՀՀԿ-ի վրա»: