«ՀՅԴ-ի համար ծանր ժամանակներ են սպասվում, Երևանի քաղաքապետի ընտրություններին հավաքած խղճուկ ձայները միայն նախերգանքն էին». Նարինե Դիլբարյան

Հայ լեզվաբան, բանասիրական գիտությունների թեկնածու Նարինե Դիլբարյանը ֆեյսբուքյան իր էջում գրել է. «Նոր լսում էի «Սանա ծռեր» համահայկական կուսակցության հիմնադիր համագումարի ելույթները, մասնավորապես կուսակցության նախաձեռնող խմբի անդամ և հիմնական գաղափարախոս Վարուժան Ավետիսյանի խոսքը, և հասկացա ավանդական ՀՅԴ-ի համար ծանր ժամանակներ են սպասվում, Երևանի քաղաքապետի ընտրություններին հավաքած խղճուկ ձայները միայն նախերգանքն էին, այս նոր կուսակցության ողջ գաղափարական հենքը Ռոստոմից եկող Դաշնակցության տեսլականներն են, և դրանց հնչեցնողների մարտական-հեղափոխական անցյալն ու ներկան իրենց շուրջ կհամախմբեն Քոչարյանի և Սերժ Սարգսյանի ժամանակների փոխզիջում հանդիսացող ՀՅԴ-ից հեռացող բազմաթիվ գործուն անդամների: «Այսպես կոչված երրորդ հանրապետության», հիմա՝ ներկայիս անկախ ՀՀ-ի վախճանը գուժող և նոր՝ չորրորդ Կուր-Արաքսյան ընդլայնվող հանրապետության գալուստը կանխագծող «Սասնա ծռեր»-ը ձախ ազգայանական, հեղափոխական դաշտը ծածկելու ակներև ներուժ ունեն՝ հեղափոխականների առաջնորդ Նիկոլ Փաշինյանին մրցակից դառնալով: Ողջ խնդիրն այն է՝ Հայաստանի Հանրապետության աջ ազատական և ժողովրդավարական ուժերն այս ալիքին համընթաց կձավորվե՞ն, մարդու իրավունքների, ազատության և ժողովրդավարության իրական եվրոպական արժեքների կրողները կկարողանա՞ն լցնել քաղաքական դաշտի այս կարևորագույն հատվածը... Քաղաքականությունն արդյունավետ գործում է մաթեմատիկական ճոճանակի օրենքներով՝ աջից ձախ տատանումների ողջ տիրույթում, եթե կողմերից մեկն անգո է կամ պատնեշված, վայ այդ ճոճանակին, նրա տատանումները թերակատար են և տխեղծ»: