«Ես չեմ եկել փոխելու Ամերիկայի քաղաքականությունը». Բոլթոն

«Ես չեմ եկել փոխելու Ամերիկայի քաղաքականությունը, այլ եկել եմ առավել լավ ուսումնասիրելու այն»,- ասել է Միացյալ Նահանգների նախագահի ազգային անվտանգության հարցերով խորհրդական Ջոն Բոլթոնը, հաղորդում է «Ամերիկայի ձայն»-ը:

Նրա խոսքով՝ Բաքվում քննարկվող կարևոր հարցերի թվում էր ահաբեկիչներին աջակցող Իրանի ազդեցության թուլացումը տարածաշրջանում, ինչպես նաև ղարաբաղյան հակամարտության կարգավորումը.

«Միացյալ Նահանգները հավատացած է, որ խնդրի հաջող կարգավորումը կարևոր է ոչ միայն Ադրբեջանի և Հայաստանի համար, այլև ռազմավարական հետևանքներ ունի միջազգային առումով»:

Բոլթոնի խոսքով՝ ղարաբաղյան կարգավորման խնդիրը քննարկվելու է նաև այսօր Երևանում, նա հավելել է, որ Իլհամ Ալիևն իրեն հավատացրել է, որ խնդրի կարգավորման կողմնակից է: Ինչ վերաբերում է Վաշինգթոնին, ապա այն լրջորեն հետաքրքրված է ղարաբաղյան հակամարտության կարգավորման մեջ.

«Միացյալ Նահանգները շատ լուրջ է վերաբերում որպես Մինսկի խմբի համանախագահերկիր իր դերին: Մենք համոզված ենք, որ և՛ երկու կողմերի, և՛ Միացյալ Նահանգների շահերից է բխում խնդրի խաղաղ կարգավորումը»:

Բաքվում Ջոն Բոլթոնին հարց են ուղղվել, թե արդյոք Ալիևի հետ քննարկելու է Ադրբեջանում մարդու իրավունքների ճնշման խնդիրը, որը հակասում է ԱՄՆ-ի ժողովրդավարական արժեքներին:

«Մենք մեր արժեքները գաղտնի չենք պահում և կարծում եմ նախագահ Ալիևը տեղյակ է դրանց մասին, ինչպես նաև՝ Վլադիմիր Պուտինը»,- նշել է պաշտոնյան:

Հավելենք, որ այսօր ԱՄՆ-ի նախագահի ազգային անվտանգության հարցերով խորհրդականը քննարկումներ է անցկացնելու Երևանում:

Ինչպես ավելի վաղ հայտնել էինք, Բոլթոնը ժամանել է Հայաստան: