«Քանի դեռ ես վարչապետ եմ, նման խնդիրներ չեն լինի». Նիկոլ Փաշինյանի հարցազրույցը չինական հեռուստաալիքին

Ինչպես ավելի վաղ հայտնել էինք, ՀՀ վարչապետի պաշտոնակատար Նիկոլ Փաշինյանը հարցազրույց է տվել չինական ամենահայտնի հեռուստաալիքներից մեկին՝ Phoenix TV-ին:

Հարցազրույցի սկզբում, խոսելով թավշյա հեղափոխությունից հետո հայ ժողովրդի պահանջների մասին, Նիկոլ Փաշինյանն ասել է.

«Հեղափոխության գլխավոր գործոնը հայ ժողովրդի ցանկությունն էր՝ լինել հարգված սեփական երկրում: Պետք է հստակ հասկանանք՝ ինչ նկատի ունենք ժողովրդի ցանկություն ասելով: Մի երկրում, որն ունեցել է կոռումպացված կառավարություն, իհարկե, դա խնդիր է, զարգացման և լավ կառավարման խնդիր և անարգանք՝ սեփական ժողովրդի հանդեպ: Եվ կարծում եմ, որ սեփական երկրում հարգված լինելն էր ժողովրդի ցանկությունը»:

Ն. Փաշինյանի խոսքով՝ կոռուպցիայի դեմ պայքարելու մեկ այլ պատճառ կար՝ ավելի շատ քանակով արտասահմանյան ներդրումներ ներգրավելը:

«Ներկայում այդ խնդիրը լուծված է, և կոռուպցիան արմատախիլ է արված: Աշխատում ենք մեր արդարադատության համակարգն իսկապես անկախ և արդար դարձնելու ուղղությամբ»,- ընդգծել է Ն. Փաշինյանը:

Հարցին, թե որն է Հայաստանը ներդրումային երկիր դարձնելու ճանապարհը, Ն. Փաշինյանն ասել է.

«Երբ քայլում ես Երևանի փողոցներով, տեսնում ես ժպտացող դեմքեր, և դա նույնը չէ, ինչ, օրինակ, 6 ամիս առաջ էր: Մենք ունեցել ենք մի երկիր, որն, օրինակ, խնդիրներ է ունեցել ընտրական համակարգի հետ: Քանի դեռ ես վարչապետ եմ, նման խնդիրներ չեն լինի»:

Բացի այդ, ՀՀ վարչապետի պաշտոնակատարը խոսել է միջազգային հանրության ընկալումների մասին: «Կարևորն այն է, որ մեր միջազգային գործընկերները հասկանան, որ մեր շարժման մեջ օտար ուժեր կամ աշխարհքաղաքական ենթատեքստ չկար: Նրանք պետք է հասկանան իրողությունը: Իրողությունն այն է, որ դա բացարձակապես հայկական գործընթաց էր: Եվ սա է կարևոր»,- նշել է Ն. Փաշինյանը:

Անդրադառնալով կառավարությունում երիտասարդների ներգրավվածությանը՝ Ն. Փաշինյանն ասել է. «Այդ մարդիկ ոչ միայն կառավարման նոր միջոցներ են բերում, այլ նաև փոխում են կառավարության մասին մարդկանց պատկերացումը»:

«Որն է վարչապետի ռազմավարությունն ու Հայաստանի ապագայի նրա ծրագիրը, հայտնի կդառնա հաջորդ շաբաթ»,- եզրափակել է չինական հեռուստաալիքի հաղորդավարը: