«Այն, ինչ ոմանց համար բիզնես է, մեր ժողովրդի համար մահացու գործիք է». ՀՀ ԱԳՆ-ն՝ Բելառուսի կողմից Ադրբեջանին զենքի վաճառքի մասին

Տարածաշրջանում սպառազինությունների մրցավազքը պետք է կանխվի: Այս մասին այսօր լրագրողների հետ զրույցում ասել է ՀՀ ԱԳՆ մամուլի խոսնակ Աննա Նաղդալյանը:

Անդրադառնալով Բելառուսի կողմից Ադրբեջանին զենք վաճառելու հարցին, Ա. Նաղդալյանն ասել է.

«Արտաքին գործերի նախարարության անունից կարող եմ ասել, որ տարածաշրջանում սպառազինությունների մրցավազքը մշտապես բարձր է գտնվում մեր օրակարգում: Դրա մասին վերջերս ԵԱՀԿ նախարարական համաժողովի ժամանակ բարձրաձայնել է ՀՀ ԱԳ նախարարի պաշտոնակատարը՝ նշելով, որ զենքի վաճառքն ու մատակարարումն ուղղակիորեն նպաստում են դրա կիրառմանն ու դրա կիրառման սպառնալիքի աճին, և մասնակից պետությունները պետք է այդ առումով վերանայեն իրենց գործելաոճը: Պետք է արձանագրենք, որ այն, ինչ ոմանց համար բիզնես է, մեր ժողովրդի համար մահացու գործիք է: Եվ ԱԳՆ-ն մշտապես իր օրակարգում է պահում տարածաշրջանում սպառազինությունների մրցավազքի կանխարգելման օրակարգը: Սպառազինությունների մրցավազքն ուղղակիորեն հանգեցնում է անկայունության աճին»: