«Բռնապետական համակարգում ո՞նց կարող էին արձակել մեկին, երբ չկա գործարք». Զ. Փոստանջյան

«Երկիր Ծիրանի» կուսակցության ղեկավար Զարուհի Փոստանջյանն այսօր ներկա է գտնվել «Սասնա ծռեր»-ի գործով դատավարությանը: Ընդմիջման ժամանակ նա պատասխանել է մի խումբ լրագրողների հարցերին: «Այն անձը, ով այսօր իբրև թե արդեն իսկ իշխանությունն է ղեկավարում, չգիտենք՝ այդ անձն ինչպե՞ս է այդտեղ հայտնվել: Եկեք 2011թ. վերադառնանք ու տեսնենք՝ ինչպե՞ս Փաշինյանին արձակեցին: Նա դատապարտվել էր 7 տարվա ազատազրկման ու նրա նկատմամբ պետք է կիրառվեր համաներում ու պատժի չկրած մասը կրճատվեր կեսով, որը կազմելու էր 3,5 տարի, բայց նա այդքան չի անցկացրել խցում. ո՞րն էր այդ գործարքի հիմքն ու ինչպե՞ս էին նրան արձակել: Բռնապետական համակարգում ո՞նց կարող էին արձակել մեկին, երբ չկա գործարք»,- ասել է Փոստանջյանը՝ շարունակելով. «6 ամիս Նիկոլ Փաշինյանը համատեղ բնակվում էր գրեթե նույն տանիքի տակ Սերժ Սարգսյանի հետ, ու իհարկե, ի հայտ կգան փաստեր. հենց այնպես չի լինում, երբ բռնապետը փոխանցում է իշխանությունն ու ասում՝ «Նիկոլ Փաշինյանը ճիշտ էր, ես սխալվեցի»»,- եզրափակել է «Երկիր Ծիրանի»-ի առաջնորդը: