«Կարիք չկա ասելու, թե որքան վճռական ենք և որքան կարողություններ ունենք մեզ պաշտպանելու համար». Զոհրաբ Մնացականյան

«Մեր դիրքորոշումները պարզ են, դուք գիտեք՝ ինչպես ենք վերաբերում կարգավիճակին, անվտանգությանը, ստատուսի հարցը որոշում է Լեռնային Ղարաբաղի ժողովուրդը, իսկ անվտանգության հարցը նշանակում է, որ այն համակարգը, որն այսօր գոյություն ունի, ապահովում է անվտանգության համապարփակությունը, և սա է իրողությունը»: Այս մասին այսօր մամուլի ասուլիսի ժամանակ հայտարարել է ՀՀ արտաքին գործերի նախարար Զոհրաբ Մնացականյանը:

«Կարիք չկա ասելու, թե որքան վճռական ենք մենք և որքան կարողություններ ունենք մեզ պաշտպանելու համար՝ թե՛ Լեռնային Ղարաբաղում, թե՛ Հայաստանում: Մենք այդ վճռականությունն ունենք, և կարիք չունենք ամեն անգամ դուրս գալու և դրա մասին կրկնելու, մենք գիտենք մեր կարողությունները, բայց մենք ցանկանում ենք խաղաղ ճանապարհով հանգուցալուծել այս գործընթացը»,- ընդգծել է ՀՀ արտաքին գործերի նախարարը:

Նախարարը հայտնել է նաև, որ կհանդիպի Ադրբեջանի արտաքին գործերի նախարար Էլմար Մամեդյարովի հետ փետրվարին Մյունխենի անվտանգության միջազգային համաժողովի շրջանակում: