«Հորդոր որոշ չինովնիկների». Ալեն Ղևոնդյան

Քաղաքագետ Ալեն Ղևոնդյանն իր ֆեյսբուքյան էջում գրել է. «Իրան ՀՀ վարչապետի այցը շատ բարդ ժամանակահատվածում է: ԱՄՆ-ն Իրանի նկատմամբ սանկցիաներ է խստացնում, ԵՄ գործընկերներին ստիպում, որ Իրանի հետ հարաբերությունները սառեցնեն: Ջ. Բոլտոնը գալիս է Հայաստան մեզ իրազեկելու, թե Իրանի շուրջ իրենց ծրագրերում մենք ո՞ւմ հետ ենք... Հետո վարչապետի անհաջող ձևակերպում «Իրանի սահմանը փակելու» հետ կապված: Շատ ավելի ուշ ԱԺ-ում հնչեցված «Իրանը ավտորիտար երկիր է» հայտնի արտահայտություն: Իրանի Գլխավոր շտաբի պատասխանը «Ադրբեջանի բռնակցված հողեր» ձևակերպմամբ: Ու այդ ամենից որոշակի ժամանակ անց, երբ ԼՂ հարցում Դավոսում ոչ առանց ամերիկյան միջնորդության հանդիպում Ալիևի հետ, որը գործնականում ոչինչ չի տալիս՝ հանդիպումից արդյունքներ ակնկալող կազմակերպիչներին/դիմացի կողմին: Այս ամենից հետո Հայաստանը զորախումբ է ուղարկում Սիրիա: ԱՄՆ-ի կոշտագույն արձագանք-գնահատականը դրան չի ուշանում: Եվ սա ռուս-ամերիկյան աննախադեպ սրված հարաբերությունների ու հայաստանյան մեդիա դաշտում տիրող «բարդակ»-ի համատեքստում: Այս ամենի վերջնարդյունքում՝ երեկ Իրանում հայտարարվում է, թե նպատակ կա Իրան-Հայաստան-Վրաստան-Եվրոպա տարանցիկ գազամուղ կառուցել նաև ռուսների ներգրավվածությամբ: Բարդ ու խճճված փուլ ենք մտել, որ վերջում հայտնի չէ, թե ինչով կավարտվի: Ուստի հորդոր որոշ չինովնիկների ու ԱԺ որոշ պատգամավորների՝ աշխատեք արտաքին քաղաքական թեմաներով կամ առհասարակ չխոսել, կամ շատ զգույշ խոսել՝ հնչեցվելիք թեզերը ճշգրտելով ԱԳՆ-ի ու Կառավարության համապատասխան ստորաբաժանման հետ...»: